黑色月光｜郭鋒澄清身體狀況出事傳聞 觀眾揣測林夏薇爺孫曖昧關係

近日喺釋出台慶劇《黑色月光》嘅拍攝花絮中，有眼利網友發現73歲復出拍劇嘅郭鋒唔記得拍檔角色名，講對白時仲冇咩力氣，繼而發現郭鋒喺劇中演出需要後期配音。大家都擔心郭鋒身體出狀況，呢日劇集進行宣傳時，郭鋒就親身解釋話當時只係因為流感後遺症失聲，但由於唔想拖累劇組，小休兩日後頂硬上繼續拍攝，所以演出要靠後期配音。見郭鋒現時身體狀況好好，亦中氣十足，各位觀眾唔使擔心。

大家都擔心郭鋒身體出狀況。郭鋒澄清自己嘅健康冇問題。林夏薇與楊茜堯。
活動唔止獲大批粉絲支持，劇組仲公布劇集收視佳績，內地視頻平台有效播放累計高達6.7億之外，第四集播出時收視更有21.2。大家唔止對Moon姐嘅復仇大計好有興趣，仲揣測林夏薇同郭鋒喺劇中爺孫關係，薇薇話日前健身舉啞鈴時，教練追問佢邊個係落毒真兇，仲問係咪同爺爺有啲奇怪關係。楊茜堯有時都會同老公羅子溢一齊煲呢套劇，但對方不時會好多發問，所以忍唔住要叫佢收聲。
薇薇話好多人追問佢劇情發展。

馬志威飾演嘅蔣基俊奸到出汁。
而馬志威飾演嘅蔣基俊奸到出汁，佢拍攝時仲專登為角色減咗十幾磅，將角色演得入形入格。另外，近日佢同劉俊謙同遊日本被網民捕鑊，馬志威笑言行程中仲同劉俊謙拍拖行公園。
《黑色月光》收視報捷。