星光路上丨楊茜堯談演出唔可以有偶包 盼與老公羅子溢同台奪視帝視后

相隔六年再返TVB拍攝劇嘅 楊茜堯 ，喺台慶劇《黑色月光》入面飾演復仇女王Moon姐一角，唔少網民都讚佢嘅演技更上一層，單係一個眼神就足以攞視后。已經喺影視獎項上奪得大滿貫嘅茜堯 ，呢日就嚟到《星光路上》，同主持 潘盈慧 傾下入行至今嘅經歷，以及而家自己對獎項嘅心態。

楊茜堯生完兩個小朋友後復出拍攝《黑色月光》
自言喺TVB長大嘅茜堯，相隔六年再返嚟拍攝，佢笑言感覺就好似返娘家一樣，遇到幕後嘅工作人員，個個都會話好掛住自己，令佢覺得相當親切。茜堯喺中學畢業就報讀TVB訓練班，不過佢話最初自己冇諗過參加訓練班，原來佢係想去做Model玩吓，而報讀訓練班就係抱住搵份工嘅心態，諗住可以見到好多明星、偶像，但當報讀咗訓練班後，令茜堯對演戲產生咗好奇心態，加上因為要同爸爸搞對抗，所以就堅係落去。

茜堯指喺訓練班出身嘅學員，要比人付出更多努力，所以由飾演小角色開展演藝路嘅佢，當時曾經同自己講，如果想喺呢行發展，就要好好珍惜每一個角色，當可以演出更多角色，或者係角色喺劇中份量越嚟越重時，就會搵到屬於自己嘅成功感，而當觀眾可以嗌得出自己劇中角色名時，就會有滿足感。
訓練班當年原來有7千多人報名競爭

由乖乖女角色，轉型演出奸角，茜堯坦言《宮心計》姚金鈴呢個角色係自己演藝路上嘅重大轉變。由於當初一心求變，所以當茜堯知道梅小青要開拍古裝劇時，就即刻向對方自薦演奸角，而為咗演好呢個角色，佢仲日日對住塊鏡練奸笑聲。
佢視《宮心計》嘅演出為事業轉捩點

至於講到《溏心風暴之家好月圓》入面「攞女」一角，茜堯挑戰受盡委屈嘅養女，劇中有唔少喊戲，茜堯指無論演咩戲都好，自己個內心要先投入咗先，演出時唔好太有偶包，加上想像就會更投入到個角色。
《溏心風暴之家好月圓》入面扮演「攞女」就令佢喊到傻

對於網民大讚佢喺《黑色月光》入面，單靠一個眼神就可以交待好多事情，茜堯就話自己冇刻意去練過眼神，只係投入咗個角色，所以散發出嘅「冷酷」。提到老公羅子溢曾表示，好彩茜堯cut機後可以好快抽離，冇將角色嘅凌厲眼神帶返屋企，對此茜堯就笑言可能帶咗老公都唔知，特別係講到幫小朋友溫習嘅事情上，凌厲嘅眼神會更犀利。
Moon姐既邪又冰冷嘅眼神令人心寒

雖然茜堯已經有多年冇參加過《萬千星輝頒獎典禮》，但佢就話對獎項睇得好淡，因為當初接演《黑色月光》，都只係想演好個角色，而冇諗過會唔會得獎嘅問題，但當講到老公羅子溢曾講過自己嘅心願，係想同老婆睇齊拎到視帝時，茜堯就即刻話會全力支持對方，仲話如果今年可以兩公婆一齊拎視帝視后嘅話，當晚收視一定會好好呀！

佢仲話希望有機會可以同老公同時獲得視帝視后獎