千嬅昆明冒寒開騷為觀眾放煙花 破紀錄唱足43首Torres現場欣賞

楊千嬅 由去年開始舉行嘅世界巡迴演唱會踏入倒數階段，星期六晚喺昆明完成第44場，亦係最後一場戶外場地演出。呢場佢仲破紀錄一場唱足43首歌；雖然現場只得10度，不過千嬅仍無懼寒冷落力演出，加上煙花效果，令28000名觀眾歡呼聲此起彼落。

楊千嬅呢日冒低溫於昆明演出
雖然戶外演出要兼顧更多，不過千嬅亦絕無欺場，為觀眾預備巡演以來首次真煙花效果，之後又換上新服裝先後一口氣連唱43首歌曲，成為最多演出歌曲嘅一場。演出後佢仲開直播表示，自己講得出做得到，必定會為每一場觀眾帶來驚喜。
呢晚仲為觀眾唱足夠43首歌曲

又趁最後一場戶外演出首次安排盛大煙花效果

千嬅呢日又指，冇諗過音樂路上可以喺海拔1800米高嘅雲南昆明開騷：「唔好講笑，真係有啲暈，但係真係好開心。」呢晚Encore時佢獻唱《飲酒思源》，現場觀眾亦一齊大合唱。雖然呢場最後戶外演出，丁生未有在場，不過一早已千叮萬囑要以保暖為先，不過囝囝Torres 特別飛到當地支持，睇騷之餘仲把握時間暢遊雲南，非常開心。

身處高海拔地區嘅千嬅亦笑指有少少頭暈感覺