中年好聲音3丨多位有故事參賽者登場 80歲羅秀蘭經歷令肥媽身同感受

啱啱喺10號播出嘅一集《中年好聲音3》，有多位「有故事的人」登場，當中包括嚟自雲南，因為意外失去雙臂嘅李金凱，以譚詠麟嘅《一生中最愛》出戰，奪得5燈亮麗成績；而現年40歲嘅「抗癌勇士」任永健，以《青春告別式》作賽亦獲得 4 燈好成績。
李金凱奪得5燈。

任永健曾因患病而失聲，更一度放棄唱歌。
任永健曾因患病而失聲，更一度放棄唱歌，如今復癒後盼以歌聲傳播正能量，主持車婉婉都大讚叫好。現時任職土木工程師嘅任永健，有份參與港珠澳大橋興建工程，今次參加《中年好聲音3》嘅目的係希望為囝囝樹立好榜樣。對於任永健嘅演出評語，周國豐就指以佢曾經失聲嘅狀態，都可以唱出當晚水準，絕對值得佢嘅囝囝為佢驕傲；而伍仲衡則表示：「唱得好好咬字 亦清晰，但略嫌牙骹有啲緊，放返鬆啲會唱得感動啲。」
任永健嘅家人都有嚟撐場。
今屆最年長嘅參賽者，80歲嘅羅秀蘭。
受亡夫鼓勵而參加《中年好聲音3》嘅80歲參賽者羅秀蘭，直言丈夫早於第一季時已經希望佢參加：「丈夫生前好鍾意聽我唱歌，2023 年突然唔舒服中風走咗，當年成日叫我參加，但唔夠膽，終於今年鼓起勇氣參加《中年好聲音 3》，希望你會聽到我唱歌。」當晚選唱《朋友別哭》嘅佢雖僅獲 2 燈，但其故事就深深觸動同樣丈夫係因病離世嘅肥媽，令其感觸落淚：「你嗰種溫柔、想唱畀老公聽個感覺，我完全 feel 到。我哋喊唔係因為 sad，係一個掛念、一個掛牽，但你相信我，佢就係喺我哋隔籬，我感受到你先生聽到你嘅溫柔、聽到你嘅愛。」
羅秀蘭受亡夫鼓勵而參加《中年好聲音3》。
肥媽聽完亦感觸落淚。
至於今集另一位 5 燈唱將，係嚟自北京、36 歲保險經紀劉曉昆，獻唱《如願》嘅佢大獲好評，肥媽大讚佢係「真正屬於舞台」，而張佳添亦直言對方係佢本集嘅驚喜：「你一開始唱頭兩句，已覺得聲音特別不同，絕對是有訓練過、偏專業的，好棒好棒！」海兒指劉曉昆比海選時嘅表現進步咗好多，至於周國豐則對佢嘅溫柔聲線讚不絕口，建議佢繼續專攻療癒式、窩心歌曲選歌嚟作賽。
劉曉昆係呢集另一位 5 燈選手。