per se音樂會帶歌迷重返校園 唱冧歌《First Love》台下狂叫結婚

組合 per se 一連兩場音樂會周末完滿結束，4月加盟另一唱片公司嘅佢哋，今次演出就獲同門 陳柏宇  林奕匡 黃妍 小塵埃 Michael C 同 力臻 等力撐，而佢哋嘅好友 許廷鏗 導演麥曦茵 謝芊彤  鍾雪瑩 張進翹 同 Kendy Suen 亦到場支持欣賞演出。

音樂會以「校園回憶」作主題，per se 為大家帶來一場全新嘅「開學典禮」重新踏進校園。呢次音樂會亦以「校歌」開首，舞台設計亦似足校園，由學校書桌堆疊而成的佈置，讓樂迷一秒重返「回憶學院」。
per se上半年加入新公司後，近日終於再次開騷

per se去年開展「回憶學院」系列，透過音樂分享遺憾，亦為同學解決未來可能遭遇嘅問題，呢日佢哋亦先後演繹多首唔同歌曲，唱至日文歌《First Love》時，Sandy同Stephen甜蜜面對面牽手，現場仲有樂迷大叫「結婚！」，Sandy亦鬼馬舉V回應，甜到不得了。
Sandy同Steven拖手唱情歌，被台下歌迷大叫結婚

per se亦邀請麗英一齊演出，分享相識經過之餘，亦合唱《全死角美少女戰士》。一身校服打扮嘅麗英話：「我一直都好鍾意per se㗎，平時我喺小薯茄高中都成日偷聽你哋啲歌。」而Stephen就指麗英去年嘅音樂會，促成《記憶之流》嘅創作。
麗英於尾場擔任表演嘉賓，同佢哋合唱

per se為樂迷三度Encore，之後Stephen宣佈明年嘅農曆年初三，將同香港節慶管弦樂團聯乘開騷。佢哋受訪時仲話完全唔夠喉，特別感謝麗英擔任尾場嘉賓，亦話今次表現有85分以上，尤其是I人Stephen：「挑戰咗自己落台同歌迷咁近距離，平時我好驚咁多人㗎，所以我哋特登有個主題，就係好似夜晚返學校探險咁，如果大家睇到我個驚樣，都當係配合主題嘛，哈。」
公司同門歌手都到場力撐

而Sandy笑言最大挑戰係同Steven合唱，尤其係「肉麻歌」《First Love》：「我哋對望嗰陣，佢喺度狂忍笑囉。」至於有樂迷大叫「結婚」，他們表示總有結婚時間，但有共識唔會喺台上宣佈，唔想因為結婚令音樂會焦點被轉移。