汪明荃紅館演唱會進入倒數 八號風球前夕繼續忙綵排

Liza姐汪明荃嘅《阿姐‧汪明荃演唱會2024》，得返個零星期就要舉行，連日來Liza姐都忙於綵排，就連「桃芝」襲港，八號風球懸掛前夕都唔可以放鬆。
林家謙呢日同汪明荃一齊綵排。
Liza姐喺IG post出同嘉賓包括林家謙同盧瀚霆嘅合照，並且寫到「打風前夕錄音室好熱鬧，Liza繼續排歌，幾位嘉賓也先後來到參于工作，有Ansonlht，林家謙、還有老板蕭潮順，陳太Florence前來探班，為我們打氣！接下來幾天就會與Sunny Wong 老師排舞蹈了。」
Kelly陳慧琳同阿姐一齊綵排。Liza姐讚Kelly keep得好好。
而前一日另一位演唱會嘉賓陳慧琳亦去咗同Liza姐綵排，Liza姐除咗多謝Kelly應承擔任嘉賓，仲大讚Kelly keep得好好，「今日樂壇天后陳慧琳與 Liza 及趙增熹大樂隊進行彩排，好多年未見Kelly，仍然keep 得好好，豐彩依然，大家沒有合作十多年，見到面非常開心，多謝Kelly擔任演唱會嘉賓。」
阿姐嘅演唱會仲有個零星期就舉行喇！
Liza姐為咗今次個唱可以話係不遺餘力，除咗忙綵排、練舞，仲好落力宣傳，頻頻邀請唔同歌手一齊跳新歌《Make My Day》嘅Dance Challenge，淨係呢個星期已經有謝安琪、林奕匡同鍾柔美同阿姐齊齊同框跳舞啦！

阿姐同林奕匡。阿姐與鍾柔美。阿姐同謝安琪。