周吉佩率義工隊赴赤柱淨灘 預告月尾演唱會歌單豐富

香港近日接連打風，不過都無損周吉佩做義工嘅決心，佢同一班吉S粉組成嘅義工隊，日前就出動去赤柱淨灘，唔止吉吉身體力行，連佢一對子女都落手落腳執垃圾，為環境出一分力。由於當日懸掛一號風球，間中都有幾陣強風，所以吉吉都不忘提醒大家要注意安全。

周吉佩與吉S粉一齊去清灘。
即將於月尾舉行演唱會嘅吉吉，近期都忙於綵排，要背歌詞、練歌、練樂器，仲要練舞，雖然辛苦，但吉吉就樂在其中，「呢個狀態好享受，因為每一日都係，起身就諗住啲歌詞，同埋諗住啲歌點樣彈，小小壓力，但自己都覺得好充實。」吉吉仲預告今次歌單豐富，除咗會唱返喺《中年好聲音》唱過嘅歌，亦有一啲從來未曾公開演唱過嘅歌，希望到時可以帶到新鮮感俾大家。
周吉佩05.jpg
吉吉嘅一對仔女都有嚟幫手。眾人喺一號風球下去清灘。