張敬軒分享張爸爸醫學奇蹟 30場澳門騷創造五億經濟效益

張敬軒 由上年12月開始舉行澳門演唱會part 1，15場橫跨聖誕同新年檔期，今年10月中再接再厲舉行par t2，同樣開足15場，加埋30場騷場場爆滿，打破場地嘅開騷紀錄，共17萬人次入場，軒公嘅號召力果然驚人。

張敬軒兩年來於澳門嘅演出已狂吸17萬人次入場欣賞
眾所周知軒公不嬲唱得又吹得，佢喺演唱會上仲大爆張媽媽親證「醫學奇蹟」事件，事關張爸爸移居香港後因為唔太習慣香港生活模式，又冇朋友，身體狀況逐漸變差，甚至要靠輪椅代步，軒仔不得已唯有安排爸爸返鄉下，結果返去兩個星期後，爸爸竟然行得番：「佢日日去飲茶，我吊住佢尾，原來佢去到茶樓就去同啲後生嘅服務員呀、隔離枱啲女人喺度傾計，然後……佢行得番呀！」軒公仲搞笑話突然醒起「遮遮」曾經同佢匯報張爸爸返內地前要求去買護膚品，原來係要買來送比女性朋友。
呢日佢又提到爸爸返鄉居住嘅趣事

軒公今次演唱會歌單以重唱女歌手經典歌曲為主，軒公表示重唱前輩歌曲係為傳承，好嘅作品唔應該因為時代沖刷而流逝。而每晚嘅「盲盒」亦係高潮，包括《留低鎖匙》、《騷靈情歌》、《餘震》、《追風箏的孩子》等等，軒公一一滿足粉絲期望，而演唱到最後一曲《不捨也為愛》時紅花灑落，離情依依，為演唱會劃下完美句點。
今次Part 2演出以翻唱女歌手金曲為主

歌迷睇軒公演唱會睇得開心，澳門各行各業都一樣咁開心，事關軒公演唱會舉行期間，澳門人流明顯增加，無論酒店、零售業或者餐廳食肆都受惠，保守估計軒公30場演唱會為澳門帶來超過最少五億元嘅經濟效益，認真犀利。

仲有指佢嘅演唱會估計為當地帶來5億經濟效益