葉泓聲陳樂榣正式註冊成婚 儀式簡單明年補擺喜酒度蜜月

拍拖年多已育有一女嘅 葉泓聲 同再懷孕已7個多月嘅 陳樂榣 ，今日正式由律師主持下註冊成婚，一對新人於家人好友袁偉豪一定，仲有 楊梓菁 蘇麗珊 等見證下成為正式夫妻，仲笑言： 「因為呢一日大家得閒，兼且係吉日呀。」

葉泓聲同陳樂榣16號正式註冊為夫妻
Gordon同Ally早前先同袁偉豪、陳家樂夫婦齊齊帶埋小朋友郊遊，今日更係全程放閃大曬幸。Gordon宣讀誓詞時更感動哽咽，佢事後話：「今次安排以家人為主，最初諗住心情輕鬆，原來誓詞係好感動，明年大宴親朋會有更多人一齊見證，相信仲會更加感動。」

正式成為葉太嘅Ally亦笑言：「我就覺得係老夫老妻，Gordon比較鐘意儀式感，我只係好肚餓想食嘢。」問到Gordon近年工作不斷又順利，係咪因為Ally旺夫時，佢就搶著答： 「我唔敢自己講，不過Gordon讚我就一定接受。」而Gordon就話喇： 「可能係我旺妻呢，因為妳都開新舖，生意興隆喎！最緊要都係大家都順利！」
呢日邀請部份好友見證，新人就話出年補擺喜酒會邀請更多朋友參與喇

預計一月中就會分娩嘅Ally，已同Gordon有共識，將於明年下半年擺酒，Gordon指： 「老婆好怕熱，會黑面！所以等天氣涼啲先擺酒，計劃明年年尾會去滑雪再去馬爾代夫渡蜜月，因為太太呢兩年一直都陀BB，要享受返二人世界，不過我唔捨得兩個女，都係一家人去旅行。」
一家四口加上即將出世嘅BB，夠晒熱鬧

Gordon亦分享相處之道：「盡量唔好激嬲老婆，大家相處要包容，好彩老婆都易氹。」Ally就認為最緊要坦白講出感受，兩夫妻唔好有隔夜仇。