獨家丨與袁偉豪陳曉華星馬宣傳 張振朗為放肆飲食預先做定運動

袁偉豪Ben 、 張振朗 同 陳曉華Hera呢日齊齊出發去新加坡同馬來西亞宣傳TVB劇集，順道會見當地粉絲。振朗話好開心有機會去到當地面對面唱歌比粉絲聽，除此之外仲有一個原因：「嗰邊嘅嘢食我都覺得非常好食，次次去之前都要做咗好多運動先，因為每一次去到都會瘋狂食嘢。」身邊嘅阿Ben都表示好認同。
陳曉華、袁偉豪同張振朗一齊出發去星馬宣傳。
Hera係第一次去星馬宣傳，佢話好期待可以跟住兩位前輩食好西，決定大擦一餐之後返香港再做返多啲運動，不過阿Ben就話佢地今次行程緊密，要搞粉絲見面會，仲有好多宣傳行程，未必有時間周圍行。
Hera第一次去星馬宣傳，佢話期待跟住兩位前輩去食好西。
其實阿Ben今次來去匆匆仲有一個原因，就係要趕返香港為一歲嘅寶貝仔袁咕碌慶祝生日，雖然阿仔仲未識得講嘢，但阿Ben出門口前都有同阿仔打招呼，交代爸爸要離家工作幾日，而食住奶嘴嘅袁咕碌亦有回應爸爸。