陳自瑤知黃翠如有喜即眼泛淚光 胡定欣稱蕭正楠早已透露喜訊

黃翠如日前終於出post公布自己懷孕喜訊，唔少圈中好友都戥佢同蕭正楠開心，呢日翠如嘅閨密 陳自瑤Yoyo 出席名媛 胡曦文Christy 精品店活動時，都有開腔回應。

Yoyo一提起翠如宣佈有喜就非常高興
問到知唔知翠如陀緊B仔定B女？Yoyo就話小朋友健康先係最重要，至於性別佢就話自己都唔知，仲話翠如相當秘密，而自己亦冇問過佢兩公婆，笑言呢個秘密等佢哋自己去揭開呀。Yoyo坦言自己知道咗呢個喜訊一段時間，佢仲重演當時翠如話畀佢聽呢個消息時，自己個反應，又指大家當時感動到眼濕濕。
佢仲話大家知消息後開心到眼濕濕

Yoyo指翠如性格比較隨意，所以相信對方一定唔係虎媽，唔會畀太多壓力小朋友，而Yoyo指平日都係阿蕭負責煮飯等，咁識照顧人，所以對方絕對係一個好爸爸呀。

袁偉豪 同 張寶兒 呢日亦帶埋囝囝 袁咕碌 一齊出席活動，而活動當日咁啱就你袁咕碌嘅一歲正日生日，見到囝囝大得咁快，Ben就話相當感觸，仲話自己睇返囝囝啲相，忍唔住半夜一個人坐喺廳度流淚。
阿Ben同Bowie帶埋啱啱1歲嘅袁咕碌出現

呢日嚟支持Christy嘅仲有啱啱宣布同 朱自賢 分手嘅 謝東閔 、 胡定欣 、 胡楓 、 馬詩慧 及 張彥博 等。定欣就話阿蕭之前都有透露少少翠如有喜嘅消息，佢都話好戥二人開心，又指睇完翠如個post自己都好感動，定欣又話平日見到阿蕭咁寵愛翠如，相信之後BB出世都一定會被寵愛上天，而自己亦好期待可以見到佢哋個BB呀。

定欣亦分享翠如懷孕後，一眾好友都非常高興

谷婭溦亦專登由廣州返嚟香港支持表姐Christy，見到咁多朋友嚟到賀，Christy都話好開心，仲透露嚟緊會擴展事業版圖。

Christy獲表妹谷婭溦返港支持