林峯新歌描述陳洛軍戀愛故事 同太太結婚五週年高調晒恩愛

《萬千星輝賀台慶》即將於下星期二隆重舉行，林峯亦落實將會返娘家擔任表演嘉賓，唔知到時佢係咪會獻唱自己嘅新歌《我又戀愛了》。

林峯下星期二將為《萬千星輝賀台慶》擔任嘉賓
講起首歌最特別嘅地方，就係黃偉文以阿峯大熱電影《九龍城寨》當中嘅角色陳洛軍為第一身創作歌詞，阿峯話感覺好新鮮。至於電影有傳即將於下年開拍續集，阿峯就相當口密，叫大家去問老闆古天樂。
《城寨》熱潮未了，新歌亦以佢角色陳洛軍為主題

阿峯呢日現身一個聖誕活動，講起節日，阿峯就話自己係一個注重儀式感嘅人，聖誕節同太太囡囡都會交換禮物。講到啱啱過去嘅結婚五周年紀念，阿峯同太太張馨月以及愛女一家三口甜蜜慶祝，問到阿峯有冇送禮物比太太，阿峯話送禮唔一定要逢年過節，平時見到適合太太嘅嘢都會買俾佢，果然係絕世好老公嘅典範呀！

阿峯仲話聖誕一定會同妻女一齊慶祝