Vian自製跳舞挑戰街訪剪接一腳踢 自學韓團舞步曝Me&將推聖誕歌

女團 Me& 成員 連家穎 ，唔止係隊中嘅舞蹈擔當，亦有一張可愛臉蛋同一對長腿，擅長跳講求力度同強勁節奏韓國男團歌曲嘅佢，原來一直都係無師自通，最近仲一腳踢長開跳舞Challenge，喺社交平台播出《Vian In Public》系列，仲話決心要跳勻全香港挑戰高難度舞蹈。

Vian早前為收集香港跳舞地點，突破I人性格到處做街訪
Vian早前就走到街頭訪問途人，收集大家認為香港嘅最佳跳舞地點，其中一站銅鑼灣就遇上貴人：「我最想挑戰同訓練自己嘅口才，我係『I』人，好少主動同人講嘢，仲要做街訪收集民意，對我嚟講係一個好大嘅挑戰。街訪當日好彩遇到KB(李健宏)前輩，佢過咗兩招俾我，佢話最好訪問啲著得好有型嘅人，因為通常呢類人都會較健談，我跟住做真係Work，好多謝KB教路。」

Vian為呢次企劃一腳踢，由選曲、編舞、拍攝、剪接都一手包辦，就連髮型、化妝、襯衫全部不假手於人。
今次Vian可以話為呢個跳舞Challenge一腳踢

《Vian In Public》已走訪過香港多個地方拍攝跳舞片，Vian指：「拍攝嘅時候都好多人圍觀，尤其第一條片喺觀塘碼頭拍，當日好多人跑步經過，會停低望，其實我唔好意思，阻到佢哋跑步，但佢哋留步睇住我跳舞，其實俾我好多energy，希望同時我都俾到energy佢哋同埋觀眾啦！」

過往Vina愛睇MV無師自通學習舞步，仲發現自己跳舞天份：「影響我最深嘅係BIGBANG、2NE1等嘅舊作品，所以特別揀咗佢哋較舊、對我影響好深嘅作品，向佢哋致敬，多謝佢哋令到今日Me&嘅Vian出現。我期望《Vian In Public》有第二季，衝出香港，去日本、韓國等外地拍攝，運用我少少嘅語言天份，同其他國家嘅人做街訪。」
佢又話希望有機會去到世界唔同地方繼續拍攝

佢亦透露Me&即將推出新歌：「係一首好有節日氣氛嘅聖誕歌，而家進行緊排舞、錄音同埋拍MV嘅工作，大家可以密切留意，因為今次對我係一個好新嘅嘗試，之前《Eye to Eye》係一首英文歌，今次就嘗試廣東歌。」