呂奇傳今年4月台北離世 相識數十載好友汪曼玲回顧精彩生活

近年長居台灣嘅粵語片年代男星 呂奇 ，近年作風一直低調，連圈中老友對佢嘅近況都不甚了解。今年4月曾傳出佢已於當地離世嘅消息，不過一直未能獲得證實，直至今日資深傳媒人 汪曼玲 剖白對呂奇嘅思念，亦於網上平台懷緬呢位多年好友。

汪曼玲指約4月時收到呂奇於台灣離世嘅消息
呂奇多年來參演逾百部電影，編劇同執導作品更同樣逾30部。
汪曼玲係少數呂奇會見面同聯絡嘅傳媒人

呂奇1939年於台山出生，10歲年來港讀書，至1959約20歲時考入當年嘅中聯影業公司演員訓練班，之後轉投邵氏，隨即獲安排演出唔同作品，好似《九命奇冤》、《睡公主》、《戀愛與貞操》等。直至1965年高烽投資開拍《公子多情》，仲力捧佢為男主角，之後佢更開始編寫劇本創作故事。
呂奇同蕭芳芳當年合演即一炮而紅

曾自組電影公司嘅呂奇，後來演而優亦開始執導，加上同任編劇，可以話係周身刀，好似《蔓莉蔓莉我愛你》就係佢自編自導自演嘅首部作品。後來粵語片步入衰退期，呂奇雖仍執導唔同作品，不過唔少都係踩界擦邊露毛影片，同樣亦因風月片題材大同小異，加上風評一般票房欠佳，令佢亦由香港影壇引退。

1987年佢完成最後一部影片《命帶桃花》後與太太移居台灣，自始一直低調生活，曾有傳佢於當地揸的士維生，不過就被佢於電台節目中否認。
早年亦曾接受TVB訪問分享生活情況

汪曼玲指早年透過當地傳媒與呂奇取得聯絡，當時呂奇開設餐廳，到2006年更曾飛往當地與呂奇進行專訪。又透露呂奇定居台灣前曾先同第二任太太 凌黛 與兩名兒子曾考慮歐美同新加坡等地方移居，不過最後決定於台灣落地生根。