StarTalk｜方皓玟苦學跳唱推輕快新歌 未理網上負皮如常堅持自我

方皓玟 近日推出新歌，年初已經指希望今年重心會推出唔同類型音樂作品嘅小明，今次就挑戰唱跳，分別推出兩首節拍輕快強勁嘅《我唔理啦》同《痴根鐵粉》，雖然自嘲體力差又手腳唔協調，不過早前公開嘅MV就見到佢同一眾Dancers合作之下表現非常唔錯喇。

方皓玟再次接受《StarTalk》許文軒專訪，分享新歌嘅故事
雖然跳舞過關，不過小明就指要邊跳邊唱一啲都唔易，反而令自己覺得更為好玩，同時兼顧跳舞唱歌同表情，令自己有唔少成功感咁話。而無意中同Dear Jane嘅Tim提起新歌，仲不經意地商量合作，由呢位已經MV作品無數嘅老友擔任導演。

過往一直型格嘅佢，被阿Tim提出嘅百老匯式華麗風格嚇倒，之後慢慢了解吓就逐漸愛上鮮艷嘅不同角度。
小明為新歌勤力練舞亦嘗試唔同風格

現今網上鍵盤戰士何其多，有意無意個體甚或團隊，匿埋螢幕後打幾粒字，就可以掀起巨浪同無數餘波，而今次小明兩首新歌主題亦接近，向Haters同呢個日漸如常嘅古怪風貌反擊。