StarTalk｜荷李活影星劉玉玲憶當年郭富城魅力 靠肌肉記憶成功應付打鬥場面

華裔荷李活影星 劉玉玲最近同Dwayne Johnson以及Chris Evans等合作新戲，營救被俘嘅聖誔老人，Lucy起初以為所有打戲都會留俾身手不凡嘅Dwayne同Chris，開拍前仲被告之唔駛特別練身手，不過就估唔到劇情都有安排打戲俾佢。

劉玉玲同Kiernan Shipka等其他演員接受專訪
我哋嘅主播王鎮泉Jeoffery早前就同幾位演員越洋專訪分享拍點滴，Lucy話劇組最初通知話最多只係打兩拳、踢兩腳，點知拍攝時先發現係大動作場面令佢好驚訝，幸好最終都成功應付呢場打戲，笑言好彩仲有拍攝《神探俏嬌娃》時嘅肌肉記憶。
Lucy同其他成員一齊拯救聖誕老人

Lucy多年前拍攝第一部電影時曾經同郭富城Aaron合作，Jeoffery仲專登搵返當年Lucy坐喺Aaron電車尾嘅相片掀起回憶殺。

而Kiernan Shipka則飾演巨形女巫，要以動作捕捉拍攝，臉上貼滿點點，頭上又有一大堆裝置，仲要瘋狂大叫，講起佢都覺得好好笑。
Kiernan Shipka就會扮演一個瘋狂大呼小叫嘅女巫

戲中有別於一般嘅聖誕老人，由金像最佳男配角J.K.Simmons飾演，呢位聖誕老人周身肌肉，年屆69歲嘅 J.K.都有透過鏡頭分享佢拍攝前，點樣健身同改變飲食習慣嚟演出呢位肌肉聖誕老人。 

聖誕老人一家就由J.K.Simmons飾演