StarTalk｜史詩巨作《帝國驕雄2》載譽歸來 導演列尼史葛重現古羅馬競技場

由列尼史葛(Ridley Scott)執導嘅史詩動作片《帝國驕雄》成為一代經典，相隔超過20年再拍續集，延續古羅馬權力鬥爭嘅故事，不過男主角就換上新面孔Paul Mescal，導演話當初只用咗半個鐘就決定由Paul出任男主角：「因為Paul有一種特質，有一份傲骨。」

列尼史葛將羅馬帝國嘅戰鬥再帶到觀眾眼前
男主角Paul為咗呢個角色都落咗唔少苦工，佢話導演係一個監控高手，對體型有嚴格要求，話自己每周喺健身房都要傳相比導演，務求達到導演對每一寸肌肉嘅要求。
丹素華盛頓參與新片演出

電影延續前作，會有大量古羅馬競技場拳拳到肉嘅肉搏戲，亦有龐大戰爭場口，為咗打造出千軍萬馬嘅磅礴氣勢，電影去咗摩洛哥、英國等多地取景，當中最難控制嘅當然就係預算部分。導演話多謝電影公司願意出資打造咁龐大嘅電影世界，不過自己都好爭氣，只用咗差唔多一半嘅拍攝期就完成部作品，仲幫電影公司節省足足一千萬美金。

續集嘅一大亮點就係邀請到金獎影帝丹素華盛頓(Denzel Washington)加盟演出，飾演有錢有勢嘅武器商人，年屆69歲嘅佢要落場打打殺殺，仲有唔少騎馬戲份，不過Denzel喺呢方面就好有心得，完全難佢唔倒呀！