萬千星輝賀台慶丨林峯勁歌熱舞掀整晚高潮 馬國明沾準爸爸蕭正楠旺氣

林峯 以特別表演嘉賓身份壓軸現身《萬千星輝賀台慶》舞台，佢一口氣獻唱四首歌曲，期間更走落台喺堂妹林夏薇、陳山聰等人面前一齊合唱，將現場氣氛掀起高潮。身為林峯忠粉嘅麥美恩趁林峯走近時，仲即刻衝上前擁抱。

林峯呢晚以壓軸之姿連唱四首歌曲

Mayanne成功獲得阿峯擁抱
台前氣氛熱鬧，後台同樣精彩，薛家燕遇到準爸爸蕭正楠時，即上前祝賀，仲乘機問翠如腹中係仔定女，阿蕭握住家燕姐隻手話「仔女都咁鍾意呀！」而身旁嘅黎耀祥、胡定欣同馬國明都紛紛送上祝賀，馬國明仲攬住阿蕭話要沾吓旺氣。
準爸爸阿蕭喺後台繼續獲大家祝福

成晚嘅焦點當然係節目尾聲嘅台慶大抽奬，首度參與台慶嘅今屆港姐參選人 鍾翠詩 奪得終極大獎「理財存款港幣」43萬，而早前喺天雨下愛車遭水浸報銷嘅 蔡潔 就抽到價值28萬嘅全新電動車。

早前受水浸影響座駕報銷嘅蔡潔抽中電動車

參選今屆港姐嘅鍾翠詩抽中終極大獎