萬千星輝賀台慶丨曾志偉率領台前幕後拜神 蕭正楠獲全台上下送祝福

《萬千星輝賀台慶》今晚（19號）就會喺電視城隆重舉行，電視廣播有限公司總經理（節目內容營運）曾志偉喺騷前率領一眾台前幕後進行拜神儀式，到嚟參與嘅包括汪明荃、胡楓、陳豪、劉丹、吳啟華同周吉佩等，而日前宣布將會榮升為人父嘅蕭正楠更係首度現身，全台上下都紛紛上前向佢送上祝賀。

一眾參與台慶同事下午齊齊參與拜神儀式

日前公開將為準人父嘅阿蕭，不斷受各位同事祝賀
準爸爸阿蕭話返到電視城後就不停收到祝賀，佢好感激大家對佢同太太黃翠如嘅關心同祝福，被問到心情係咪仲好激動時，阿蕭話心情好忐忑，仲望住身邊嘅袁偉豪、陳山聰、陳展鵬同馬國明時話相信經歷過嘅都明白，馬國明即笑指「我有一對貓」。阿蕭話而家係全神貫注照顧太太，仲自言要非常機警，隨時服待周到。馬國明問到翠如情緒會否好波動時？阿蕭就話好好，只是一日鬧自己三次。

開心到一直笑唔停
吳啟華亦都有現身

《萬千星輝賀台慶》 20:15 翡翠台 現場直播