TVB台慶｜18位藝人分享演藝體驗苦中有甜 祥哥阿Bob多年體會努力終有回報

無綫電視踏入57周年，一年一度嘅慶祝盛事《萬千星輝賀台慶》，11月19號(下星期二)晚就隆重舉行。 今年台慶主題係「同一家人，與你前行」，唔止將會有接近300位現役藝人同昔日無藝人好友將雲集電視廣播城「回家」助慶之外，仲邀請咗18位代表唔同年齡層同界別嘅藝人朋友，同大家分享喺TVB嘅成長同經歷、仲有體驗到嘅「TVB精神」。

18位藝人包括 黎耀祥 黃翠如 林盛斌 黎寬怡 蔡思貝 汪明荃 王祖藍 李思捷 阮兆祥 車婉婉 陳㦤德 譚輝智 錢嘉樂 高海寧 周吉佩 C君 陸浩明 同 莊子璇 ，一系列宣傳片由星期一晚起開始陸續喺翡翠台黃金時段播出。
一眾藝人拍攝嘅台慶宣傳片將陸續同大家見面

而打頭陣同大家分享嘅，就係台慶劇《巾幗梟雄之懸崖》男主角「柴十七」—黎耀祥喇。先後憑《巾幗梟雄》第一、二季，以及《大太監》而三奪《萬千星輝頒獎典禮》最佳男主角嘅祥哥，自1986年開始拍劇生涯，轉眼已經喺電視圈打滾38個年頭。
入行30多年嘅祥哥分享自己由小角色堆砌經營嘅成功之路

祥哥喺宣傳片中坦言從演多年，確實遇上過樽頸位：「我入行做咗十幾年閒角，先至可以叫做升上配角嘅位，又做咗十幾年嘅配角，先至可以做到主角，當時自己都有啲深深不忿，因為覺得自己好盡力，人哋對我評價又幾好，點解唔可以進一步呢？」

祥哥又謂當時幸好自己繼續堅持，又以「儲印花」比喻唔放棄同繼續努力嘅重要性：「人生好似我哋去超級市場買嘢儲印花，當你儲夠印花，先可以換到禮物。換印花嘅過程其實好長，如果你半途而廢、唔儲夠足夠印花，你所有印花就會變成廢紙。所以我依家都仲儲緊我人生嘅印花，可能10年、20年後，我又可以換到上天畀我嘅一份禮物。」
佢以超市儲印花比喻人生同演藝之路

而今晚黃翠如嘅片段會接棒播出，佢將分享「開心」同「笑容」，內容結集翠如以往拍攝嘅旅遊節目見聞同感受，相當感性。而星期三、四及五將分別播出林盛斌（Bob）、蔡思貝同黎寬怡(貓仔)嘅分享。
翠如一如既往同大家正面分享開心同笑容

阿Bob主持《360秒人生課堂》時已充份展現講故事能力、以及佢對人生哲理嘅追求了解。佢喺宣傳片分享自己點由唔怕蝕底、到變成今日所有人眼中幸運兒嘅經歷同心路歷程，當中一句： 「明知件事幾咁搵笨都好，畀心機，盡心盡力咁去做，個天係會睇到，有一日， 佢會用一個你意想不到嘅方式，透過某啲途徑，回報返去你身上。」
阿Bob就認為做人做事都要唔怕蝕底

至於蔡思貝就會同大家分享Team Work，宣傳片曝光唔少佢早前拍攝《與天地對話》時嘅幕後花絮；至於貓仔就享加入《東張西望》7年嘅苦與樂，貓仔指身邊不斷有朋友問「做藝人咁辛苦為乜」，但一路以來「東張經驗」令佢覺得再危險、更污糟嘅採訪經歷，都係得多於失：「親眼見證過太多被逆轉嘅生命故事，我永遠都忘記唔到佢哋嘅眼淚同笑容。」
蔡思貝會分享《與天地對話》嘅拍攝過程

加入《東張》7年嘅貓仔亦有唔少苦樂同大家分享

《萬千星輝賀台慶》11月19號晚 20:15 翡翠台 現場直播