新歌宇宙逃生口獲粉絲落力應援 Aska視粉絲如屋企人見證成長

Aska張馳豪 之前推出新歌《宇宙逃生口》，新曲風獲得唔少讚賞，除咗歌迷好鍾意，首歌仲打入各大排行榜，今個星期更成為電台冠軍歌。Aska得知消息都好多謝大家嘅支持：「可以攞到好成績我係十分之開心，呢一首歌又係玩咗一啲平時廣東歌好少聽到嘅曲風，可以將我平時聽開嘅音樂類型變成自己嘅創作，再分享俾我嘅樂迷，係我作為一個唱作人好享受嘅事。」

Aska嘅Fans為支持佢嘅新歌，合資於唔同鐵路站、商場同巴士上賣廣告

Aska就親自去唔同地點打卡，又多謝大家嘅支持
Aska首歌可以有咁好嘅成績，一班粉絲功不可沒，為咗支持偶像好落力應援，除咗之前喺旺角大型廣告板、巴士站燈箱同巴士車身賣廣告之外，近日佢地仲租用咗金鐘地鐵站內多塊廣告牌為Aska助威，令Aska相當感動，仲特別親自去到打卡：「其實我係有啲感觸嘅，因為我嘅粉絲真係對我好好。呢班fans有好多都好似我嘅屋企人咁，不離不棄，見證住我一步一步嘅成長。好多謝佢哋冇放棄過我，同埋喺我最低落嘅時候俾咗力量我。」Aska承諾大家2025年會繼續突破框架，創作更多好音樂，佢仲預告嚟緊有機會再拍劇，大家可以期待一下啦！

Aska認為大家喺自己低潮時都一直支持，所以一定會繼續努力

新歌廣告遍佈唔同地區