台灣藝人納豆沖繩求婚成功 於明年與女友依依舉行婚禮

台灣藝人納豆（林郁智）今日（20號）傳出好消息，佢向拍拖8年嘅女友陳依依求婚成功，將會於明年舉辦婚禮。
納豆向女友依依求婚成功。
據台灣媒體報導，納豆喺拍攝綜藝節目期間，於兩位拍檔曾子余及梁舒涵嘅見證下，喺沖繩沙灘單膝跪地向依依求婚，當時納豆深情地向依依告白，指自己條命都係對方執返嚟，無論佢會唔會答應自己嘅求婚都好，納豆話自己都會用剩下嘅所有嚟照顧、陪伴同愛對方，聽完男友嘅深情告白，依依即淚灑當地，並點頭答應。
二人將於明年舉行婚禮。
納豆喺2022年突然腦出血中風，要緊急送院開刀治療，期間依依一直不離不棄照顧在旁，多次硬拉想放棄嘅納豆去醫院接受治療；而經過一年多嘅休養，納豆終於復出繼續演藝工作。而據知納豆揀喺11月20日向依依求婚，原來係包含住「依依，愛你的日子。」呢個寓意。
納豆嘅深情告白令依依瞬間淚崩。