ANSONBEAN歌迷辦生日會祝賀踏入24歲 爆肌型男獲母獻吻罕擺可愛Post

擅長跳唱嘅新晉歌手 ANSONBEAN (陳毅燊)今日24歲生日，日前一眾「豆粉」(歌迷暱稱)為佢慶祝，相隔3年再同歌迷聚會，連父母同細佬都一齊參加，陳媽媽仲徇眾要求吻賀壽星仔，非常溫馨。

ANSONBEAN父母同細佬都一齊參與今次生日會

陳媽媽即場錫啖乖仔
早前隨唱片公司一眾歌手參與School Tour嘅ANSONBEAN，仲為支持自己嘅豆粉獻唱《RISE》，佢話因為唔少歌迷都未能現場欣賞，所以藉呢日生日會特別重演，之後又分別唱出《GET WILD》同《ONE DANCE》，最後再加上《you made my day》，佢仲話呢首歌特別為豆粉創作，同的其他作品風格有好大分別，亦唔會公開表演，係豆粉專屬咁話。
呢日當然要為大家簽吓名

之後同大家玩遊戲時，一眾歌迷分組進行跳舞比賽，勝出嘅就獲得合照機會，仲由豆粉決定ANSONBEAN擺咩甫士，性格內斂嘅佢竟為豆粉破例擺出唔少哥愛少女風動作，氹到全場齊齊尖叫拍掌。
一向又Cool又型嘅佢，呢日玩得興起竟擺出唔少可愛Post

而喺全場大合唱生日歌、許願同接收禮物之後，ANSONBEAN亦同大家深情對話，佢話自己曾經因腳傷情緒陷低潮，現已重新振作，「有段時間準備咗啲作品，例如想拍武術、跳舞片，因為腳傷拍唔到。不過我腳傷啫，仲可以唱歌、寫rap，可以做好多嘢。我亦知道自己喺IG失蹤咗一段時間，多謝豆粉留低和陪伴，我會繼續努力。」
又向歌迷指自己會繼續向唔同方面努力發展

佢又指雖然唔活躍於社交平台，不過依然感謝豆粉不離不棄，又承諾繼續努力，希望得到更多認同，唔辜負大家嘅愛戴。

因為工作已3年未辦歌迷聚會嘅佢，希望將來會有更多機會同豆粉見面：「剛才收到好多生日禮物，我返屋企會慢慢拆同睇大家嘅信，佢哋入場嘅時候寫咗一啲心意，整咗本紀念冊，我即場讀出嚟，真係好開心，感受到大家對我嘅愛。」