陳可辛LA參與第十屆亞洲國際電影節 獲頒「雪豹傑出電影成就獎」獻已故影人父親

不時都同 吳君如 形影不離嘅 陳可辛 ，近日竟然未有一齊現身君如有望競爭影后嘅金馬獎盛典，原來Peter日前到美國出席於洛杉磯舉行嘅亞洲國際電影節，仲獲頒「2024年雪豹傑出電影成就獎」(Snow Leopard Outstanding Cinematic Achievement Award)，表揚佢多年嘅影壇傑出成就 。

致辭時佢仲指自己得獎全因為父親：「我想把這個獎項獻給去年去世的父親，他是我愛上電影的理由。」電影節又安排播放佢嘅經典作品《甜蜜蜜》，映後Peter亦親自出席答問環節，佢仲指作品公映已28年，重溫時勾起唔少昔日嘅回憶。
陳可辛日前獲頒雪豹傑出電影成就獎

「雪豹傑出電影成就獎」每年頒予於國際影壇具長期卓越成就嘅電影人，過往奧斯卡得主趙婷同韓國名導朴贊郁都曾經得獎。大會於Peter領獎前播放一段6分鐘片段，回顧佢過往30年嘅重要時刻，全場觀眾觀賞後熱烈拍掌。
席間佢分享過往30年嘅經驗，亦緬懷同為電影人嘅已故父親

感觸良多嘅Peter致辭話：「剛播放的6分鐘短片我看到自己過去30年一晃而過，我想感謝『電影』帶給我的一切，很榮幸影展頒這個獎給我；如果沒有大銀幕，我們就無法講述那些非常個人的故事，並與觀眾交流。我想把這個獎項獻給去年去世的父親，他是我愛上電影的理由。」Peter致辭時仲感動到眼泛淚光，感謝同樣係電影人嘅父親陳銅民栽培。
Peter於美國舉行嘅亞洲國際電影節與嘉賓交流

《甜蜜蜜》放映活動反應熱烈，而映後答問會更由Peter母校洛杉磯加利福尼亞大學(UCLA)教授白睿文主持，Peter現場分享當年決定半途輟學拍片，先誕生呢部受廣泛喜愛之作：「如果我完成咗學位畢業，咁無可能會有《甜蜜蜜》出現，人生計劃永遠趕唔上變化，所以都多得自己無讀到書而拍咗呢套戲出嚟。」
佢認為當年輟學投入電影事業嘅選擇正確

今次係佢自從2013年同已故父親於威尼斯一同欣賞《甜蜜蜜》復修首映後，相隔11年再度重溫，Peter感慨：「我細個印象嘅尖沙咀，都係因為放學成日周街玩，啲橫街窄巷，麼地道賣瓷器，棉登徑有家具店，而家都已經消失得一乾二淨，有好多建築物都拆咗。其實都幾慨嘆，睇睇下諗到，發現電影真係好重要，係一種紀錄嚟，都好開心今次有重睇返自己舊作，好多回憶湧返出嚟 。」
同影迷討論亦令佢更了解年輕觀眾睇法

Peter又笑言現場觀眾大多係Z時代朋友，唔少人仲係首次欣賞呢部28年前作品，令佢非常欣慰：「好開心見到佢哋睇完部戲咁大反應，仲捉住我輪流逐個傾偈，本身半個鐘嘅活動變成3個鐘，同大家傾佢哋對電影嘅睇法，我覺得多咗了解同好滿足，不過平時我個囡都同我分享好多。」