古巨基任酒店聖誕亮燈嘉賓 與Kuson齊練歌已有禮物心水

古巨基 日前應邀擔任一間豪華酒店嘅聖誕亮燈儀式嘅特別嘉賓，佢仲預早「應節」，現場演唱《White Christmas》同《Santa Claus Is Coming To Town》兩首經典聖誕歌，提早同現場嘅VIP迎接佳節。

古巨基獲一間豪華酒店邀請擔任聖誕亮燈嘉賓
古Sir提起聖誕燈飾就回想中學時期嘅聖誕經歷：「我會約同學出尖沙咀睇燈飾，每次經過呢間酒店，都覺得好似一座擺滿藝術品嘅博物館，一定要喺門口個噴水池影相打卡。冇諗過有一日能夠喺呢度唱歌，仲係一啲咁classic嘅聖誕英文歌，覺得真係好微妙。」
佢仲回憶年輕時每年都同朋友到尖沙咀欣賞燈飾嘅往事

今次嘅表演囝囝Kuson、古sir父母同外父、外母都一齊捧場，Kuson仲邊睇邊大叫爸爸，非常興奮。佢仲已經諗定今年準備俾Kuson嘅禮物喇：「今年應該會送關於9大恆星嘅圖書同埋玩具俾佢，因為佢最近好鍾意關於星球嘅嘢。」
身為人父嘅佢仲已經諗定聖誕送俾Kuson嘅禮物清單喇

提到Kuson現場咁開心，古Sir就話：「佢睇完我表演之後問我：『爸爸，點解你唱咗我要喺學校表演嘅聖誕歌呀？』原來佢之後要喺學校表演《Santa Claus Is Comin’ to Town》，所以呢兩日我哋兩父子都一齊練歌。」