陳柏宇領軍大學開校園騷 自嘲差啲生得出台下學生

陳柏宇 率領一眾公司歌手喺半個月內到六間大學巡唱，11月26號佢就聯同 黃妍 葉巧琳 per se 小塵埃 力臻 布志綸 KING CotaBoii Michael C 去到香港中文大學。為咗迎合中大傳統，眾歌手喺台上 dem beat，不過唔少人都係首次 dem beat，事前只係用咗15分鐘同中大同學排練，大家都話：「好難！」喺台上發施號令嘅Jason見到台下青春又熱血嘅學生，自嘲話：「爭啲生得佢哋出！」

陳柏宇同公司一眾同僚齊齊參與喺中大舉行校園演出
適逢呢日係Mischa正日生日，台下近千人合唱生日歌，令壽星女感動到眼濕濕，仲不停向台下派飛吻。事後佢話好感動，成個畫面好窩心，佢話「有啲同事忍咗咁耐唔同我講生日快樂，原來佢哋有個 surprise 畀我，所以係充滿住愛；其實生日要做嘢都係唔錯，因為會多啲人同我一齊慶祝生日，如果唔係我都係同屋企人食飯，所以工作中渡過都係開心事。」
大家仲話當日正日生日嘅葉巧琳唱生日歌，場面澎湃

Alan獻唱時現場氣氛非常熱烈

到大合唱環節，Jason 獻唱《你瞞我瞞》時，佢話：「呢個版本嘅《你瞞我瞞》，對上一次唱都可能係4年前。」有人大叫：「仲 keep 到呀！」Jason 笑住回應：「唔好畀反應住！」當 Jason 開口一唱，勾起唔少人嘅回憶，台下嘅學生邊聽邊揮手尖叫。 Cath 除咗為中大同學帶嚟新歌，仲走落台被同學重重包圍下大合唱；曾經係數學老師嘅力臻，今次返到母校心情相當興奮，佢走入人群中自製四面台演唱，被同學包圍嘅力臻仲一度激動講出心底話：「邊個話老師唔可以唱歌！」而獻唱《森林》嘅 Alan，當前奏奏起時，台下學生已瞬間 high 爆，掀起高潮。完成咗四站之後，下月初將會再到另外兩間大學獻唱。

Jason就指多年未有現場獻唱《你瞞我瞞》

Cath到台邊同現場同學近距離接觸