萬千星輝頒獎典禮2024丨鄭則士以品酒評論黎耀祥 陳自瑤首入圍視后淚灑台上

《萬千星輝頒獎典禮2024》將於明年1月19號喺澳門隆重舉行，無綫今日公布其中12個獎項嘅提名名單，觀眾可由即日起至香港時間明年1月12號深夜12時前掃瞄《萬千星輝頒獎典禮2024》QR Code上網投票，今年劇集同綜藝節目可以話係百花齊放，最佳劇集有17部作品角逐，視帝視后入圍名單同樣星光熠熠。

眾藝人出席公布提名名單記者會。
上年視帝得主陳豪憑《企業強人》再度入圍，今次競爭好激烈，陳豪話仍有信心再奪視帝，但係要睇吓彩數；鄭則士以品酒評論對手，睇黎耀祥嘅劇好似品嚐香醇嘅酒易入口，但係酒精濃度好高，易被祥仔迷魂咗。

視后嘅競爭都好激烈。最佳男配角候選人。
張曦雯獲三個視后提名，直言係豐收嘅一年，今年角色有好多新嘗試，佢好感激觀眾支持，佢當然想攞獎，但係今年對手好強；陳自瑤首度入圍視后，喺台上致詞時淚灑台上，表示等咗20年終於有機會企喺呢個界別，坦言拎唔拎獎真係唔重要，有提名對佢嚟講已經好有意思。
譚俊彥 孔德賢 陳豪 鄭則士
蔡潔有感爭視后嘅機會唔大，但係有份提名視后，已經係一個新嘗試，得到觀眾認可已經好開心；胡定欣就形容自己今次入圍名單係「大包圍」，除咗角逐視后之外，仲入圍最佳女主持、最佳電視歌曲，而譚俊彥本來想同定欣拎「最受歡迎電視拍檔」，點知發生今年冇咗呢個獎，佢同定欣要轉戰角逐最佳電視歌曲獎，譚俊彥笑言自己衝擊樂壇好多年！
陳自瑤
今年最佳男、女配提名名單雲集老中青演員，當中憑《企業強人》入圍嘅姜大衞喺台上逐一恭喜其他演員外，亦分享自己心底話，佢好期待首奪男配獎；傅嘉莉入圍女配提名，佢好感激前輩鄭則士教導。
姜大衞率先摸下個獎先。