潘盈慧孖三太樊亦敏鬼馬拍片拉票 麥美恩笑許文軒年紀跑贏所有飛躍男候選人

TVB娛樂新聞台主播今年相當好成績，喺剛公布嘅萬千星輝頒獎典禮2024提名名單中，四大台柱周奕瑋、潘盈慧、許文軒（Edmond）同王鎮泉均有提名，四位分別入圍最佳男女主持獎，而阿盈同Edmond更喺公布提名名單記招擔任司儀，親自公布自己入圍好消息。

萬千星輝頒獎典禮2024提名名單中，四大台柱周奕瑋、潘盈慧、Edmond同王鎮泉均有提名。

阿盈同Edmond孖住獲提名嘅黃建東、林景程同樊亦敏拍鬼馬短片放上社交平台拉票。
記者會完畢後阿盈同Edmond孖住獲提名嘅黃建東、林景程同樊亦敏拍鬼馬短片放上社交平台拉票，幾位扮「爭獎」，樊亦敏仲肉緊爬上台爭埋一份，相當猴擒！

樊亦敏仲肉緊爬上台爭埋一份，相當猴擒！
阿盈憑《娛樂頭條》再度入圍嘅最佳女主持獎，喺社交平台發文表達再度入圍嘅感言：「再度入圍最佳女主持，但第一次喺台上講感受、原來真係會緊張㗎喎，我喺台上話好多謝俾我訪問過嘅你你你，多謝你哋嘅包容先令我一步一步成長。」

阿盈憑《娛樂頭條》再度入圍嘅最佳女主持獎，喺社交平台發文表達再度入圍嘅感言。
阿盈希望每年都會進多一啲 ﹐得到大家更多嘅認同，佢會繼續加油，多謝大家支持，「娛樂頭條嘅威力係…出到街個個都識叫我做阿盈」。

麥美恩笑Edmond係飛躍男最年長候選人。
Edmond再度入圍飛躍進步男藝員同最佳男主持，被緋聞女友麥美恩喺限時動態笑佢年紀上跑贏同樣入圍飛躍男嘅黃建東。其實兩人係同年只係生日相差兩個月，但係麥美恩的確洞悉到Edmond係飛躍男最年長候選人，足足大年紀最細嘅馮皓揚23歲！