StarTalk | 張艾嘉重視阿仔交友關係 林嘉欣為入戲刻意保持距離

張艾嘉、林嘉欣主演嘅新戲《女兒的女兒》探討女性不同角色同想法，呢日兩位作客TVB娛樂新聞台節目《StarTalk》接受主播王鎮泉專訪，分享合作感受。嘉欣同張姐難得合作就飾演母女，因為電影題材較寫實，所以喺拍攝現場氣氛比較嚴肅，二人需要為入戲而保持距離。

張艾嘉同林嘉欣作客TVB娛樂新聞台節目《StarTalk》接受主播王鎮泉專訪。

嘉欣就話喺台灣拍攝時雖然要為對方留有空間入戲，不過拍到紐約時，二人關係變得親密啲。 拍完呢套戲後，令兩位更珍惜同媽媽、女兒嘅相處時光。張姐就話媽媽已90幾歲，所以會明白當媽媽越嚟越老，相處日子日漸變少後，心態會因此有所改變。而有2個女兒嘅嘉欣笑言，自己每日面對兩個荷爾蒙變化好大嘅青少年，明知佢哋讀書壓力好大，自己會等小朋友呻完之後再進行開解。

張姐見媽媽越嚟越老，相處日子日漸變少後，心態會因此有所改變。

張姐作為人母，自己有陣子都怕小朋友太乖，認為反叛期係成長必經之路，最重要係家長識將小朋友拉回正軌。講到自己同阿仔嘅關係，張姐就最重視阿仔嘅交友關係，以免行差踏錯。 

嘉欣笑言面對兩個荷爾蒙變化好大嘅青少年，明知佢哋讀書壓力好大，會等小朋友呻完之後再進行開解。

張姐分享自己昔日喺紐約留學往事，覺得當年同現今環境唔同，現世代小朋友接觸嘅範疇方向太多，昔日舊年代並冇咁多選擇，只要自己認定想要咩、目標係咩，就會努力做。現今年輕人頻繁係「活於別人生活」，太沉迷玩社交網站而忘記自己生活，所以將目光放現實時，往往會被困難嚇怕，因為怕失敗而難以完成目標。 女性好容易喺生活上往往容易被身分所束縛，難做到想做嘅事。不過張姐唔覺得自己有呢個煩惱，嘉欣亦同佢一樣，為兼顧事業、家庭，一直好努力令兩者取得平衡。