吳尊為陪伴兒女久未接戲 拒絕溺愛盼小朋友學懂吃苦

近年迷上打網球嘅吳尊，日前獲邀去到澳門出席網球活動，佢仲即場大顯球技，吳尊仲話呢項運動，已經成為咗佢哋一家四口嘅親子運動，吳尊表示太太同阿仔都係網球發燒友，所以佢哋經常都會一齊打波，而囡囡雖然唔係好熱愛打網球，但佢亦都識少少球技，所以一有時間佢哋都會全家出動打網球。
吳尊日前獲邀去到澳門出席網球活動。

而家以家庭為重嘅吳尊，喺揀選工作方面都會以仔女為先，所以佢話自己已經好耐無接戲，因為每次拍戲都要花兩、三個月時間，實在克服唔到要離開佢哋咁耐，因為佢話小朋友而家夜晚都仲要抱住佢，直到有一日小朋友唔再需要佢嘅時候，佢就話可以回歸拍戲啦！
吳尊話因為小朋友而好耐冇接戲。

雖然吳尊好鍚一對仔女，但係喺教育方面，佢就表示一定唔會過份溺愛：「我覺得小朋友從小就要開始學習去習慣吃苦，我覺得會吃苦的小朋友，以後才會能做更多東西，要讓他們覺得說，生活不是這麼的完美的，因為我覺得有苦才能成長。」至於小朋友將來如果要入娛樂圈嘅話，吳尊就話無所謂，無論佢哋想做運動員、想做藝人，佢都會支持佢哋，但最重要係要保持積極樂觀、謙虛、上進嘅心態，咁就無問題啦！
當日好多人搵吳尊影相簽名。