周吉佩圓滿舉行首個個唱 期待赴澳門再開騷

周吉佩出道16年終於迎來首個個人演唱會，夾band出身嘅佢，着住紅色bling bling西裝出場大騷結他功力，除咗rock嘅一面，吉吉當然都有感性一面啦！佢分別獻唱《你是我唯一的》同《留給這世上我最愛的人》送畀太太以及喺天上嘅父親。當吉吉提及亡父時，更一度哽咽：「雖然佢已經離開我哋20年，但我知道佢一直都喺身邊守護我，今日我好希望爸爸可以睇到，你個仔冇令你失望。」
出道16年，周吉佩舉行首個個人音樂會。提起亡父，吉吉即眼紅紅。
咁感動嘅時刻，當然唔少得吉吉嘅一對仔女啦，佢哋同一大班小朋友齊齊喺台上同吉吉大合唱《青春頌》同埋《第三人生》，氣氛溫馨。至於嘉賓陣容都好有驚喜，分別有80歲嘅尹光，以及18歲嘅 Yumi鍾柔美 ，吉吉仲同Yumi跳唱《APT.》呢首神曲，不過佢就話自己向來唔擅長跳舞，所以呢晚已經出盡全力喇。
吉吉邀請咗佢一對仔女同一班小朋友一齊上台演唱。
話晒都係首個個人演唱會，所以呢晚有唔少圈中人嚟到支持，包括吉吉嘅中聲好戰友羅啟豪、林鉫徫、吳大強、李佳、支嚳儀、丁文俊、涂家堯、魏嘉信、顏志恒、阿Bob林盛斌、三姐蕭秀香、麥美恩、吳業坤、韋綺姍、冼靖峰以及一班中二生等，吉吉亦特登走落台同大家握手擁抱。
仲有Yumi做嘉賓。
演唱會圓滿落幕，吉吉開心之餘，亦都已經訂定位，話要同家人大擦一餐，不過食還食，吉吉就話唔可以食得太放肆，事關演唱會好快就會移師去澳門舉行part 2，吉吉都話自己好期待呀。
嘉賓仲有 尹光 光B
吳業坤

李佳、吳大強、羅啟豪、林鉫徫。

冼靖峰、王玥、林思彤。