鍾嘉欣佛山個唱獲父母細女撐場 大讚細女有潛質繼承衣砵

鍾嘉欣（Linda）繼廣州開騷後，日前喺佛山舉行一連三場演唱會圓滿落幕，歌迷反應熱烈，場場座無虛席，嘉欣罕有獲父母同孺囡Anika由溫哥華到佛山捧場，難怪Linda指佛山站演唱會，對佢嚟講別具意義。

鍾嘉欣繼廣州開騷後，日前喺佛山舉行一連三場演唱會圓滿落幕。
呢次嘅佛山演唱會，雖然同之前廣州站一樣，嘉欣以經典金曲《一顆不變的心》為演唱會揭開序幕，不過個唱流程、舞台設計、服裝同燈光效果卻截然不同，希望每場演出畀到觀眾新鮮感。嘉欣指佛山站演出除咗保留「扔花球」環節，仲加插「民選」歌曲部分，而佢最難忘就係同觀眾一齊唱《月亮代表我的心》，全場氣氛好warm，嘉欣都話好感動啊！

嘉欣以經典金曲《一顆不變的心》為演唱會揭開序幕。
今次佛山站亦有「重量級」觀眾撐場，嘉欣表示：「係我好重要嘅人嚟睇我演唱會，佢哋係我阿爸阿媽同埋細囡，其實我入行咁耐，阿爸阿媽好少機會睇我演出，阿爸直頭係未睇過，好開心佢哋終於可以睇到，親身見證佢哋個女努力嘅表現。因為我大女同個仔要返學，所以淨係細囡嚟，佢都係第一次睇我演出，佢嘅反應好興奮，雖然佢戴住耳塞，但都睇到又跳又唱。」

今次佛山站有「重量級」觀眾撐場，就係父母及細女撐場。
嘉欣續指獻唱《做你的晨曦》時，被觀眾席上嘅媽媽感動到喊：「呢首歌係講我對女兒嘅愛，因為今次媽媽在場，唱呢首歌時會憶起好多媽媽湊我嘅回憶，令我忍唔住喊，冇諗過自己會喊，好感動，所以每次望到觀眾席上嘅爸爸媽媽同阿女，我都要避開視線。」

嘉欣表示三個仔女當中，佢覺得Anika最有機會繼承佢表演嘅「衣砵」。
提到孺囡Anika，嘉欣表示三個仔女當中，佢覺得Anika最有機會繼承佢表演嘅「衣砵」：「佢雖然最細個只有兩歲，但性格比較外向，把聲好大聲又清脆，唱歌應該會幾好聽，而且佢一聽到音樂及拍子聲就會跳舞，好有節拍感。」

監製梅小青同老公劉家豪都有特登嚟撐場，佢哋曾同嘉欣合作過多部劇集。
除咗家人嘅支持之外，監製梅小青同老公劉家豪都有特登嚟撐場，佢哋曾同嘉欣合作過多部劇集，好似《法證先鋒》系列、《公主嫁到》同《當旺爸爸》。小青姐仲喺微博發文，話好欣賞嘉欣嘅努力不懈，更欣賞嘉欣嘅重情重義，期待嘉欣有更佳嘅作品。

嘉欣希望每場演出畀到觀眾新鮮感。
嘉欣透露將一家五口來港過聖誕節，佢心情十分興奮，佢老公同仔女都好鍾意香港呢個地方，覺得香港好方便、好多姿多彩，就算行街買衫嘅款式都畀加拿大多，每次返港，佢哋都學到好多廣東話，嘉欣都想帶佢哋返嚟多啲。

嘉欣透露將一家五口來港過聖誕節，而佢老公有好多親戚喺香港。

嘉欣指老公同仔女都好鍾意香港呢個地方，覺得香港好方便、好多姿多彩。