郭富城任活動嘉賓政務司長邀啟德開騷 哨牙悍匪獲男主角獎感恩付出獲認同

郭富城 唔止係舞台皇者同好爸爸，呢日仲以榮譽大使身份參與一個鼓樂活動，現場仲即席敲擊一個幾層樓高嘅蘭州太平鼓，聲勢認真澎湃，城城仲話之前有專人教導，仲話一不留神隨時會連肺都震穿呀。

郭富城呢日現場敲擊一個超巨型太平鼓
啟德體育園即將正式啟用，而城城呢日仲獲政務司司長 陳國基 邀請，到啟德開騷演出，城城就指對新場地非常有興趣呀。既唱同時演出唔少電影嘅佢，早前戴哨牙扮悍匪嘅《臨時劫案》演出，獲內地一個年度男主角獎，呢日佢就指當時花盡心思研究投入，今次得獎係對自己極大鼓勵咁話。
佢又獲政務司長邀請到啟德體育園開唱

好快又會出埠繼續演唱會巡迴嘅城城，又提到已入場支持近日熱爆嘅《破．地獄》，自認眼淺嘅佢更大讚作品令自己非常感動，更有釋懷嘅感覺，又大讚導演功力係觀眾之福呀。

早前佢扮演嘅哨牙悍匪，獲內地年度男主角獎