StarTalk丨黃凱芹對華仔《愛不完》情有獨鍾 難忘音樂人杜自持綵排肉緊爆粗

黃凱芹及著名音樂人杜自持一向合作無間，嚟緊一齊開音樂會，呢日佢哋現身TVB娛樂新聞台節目《StarTalk》，跟主播 許文軒 暢談呢次雙人音樂會嘅構思，二人揀咗一啲大家合作嘅歌，一啲係杜自持幫人編嘅歌，整個感覺幾似一個作品展。

黃凱芹同合作多年嘅杜自持即將合作開騷
黃凱芹笑指杜自持幫劉德華做監製時，佢有幻想若果搵到杜自持做監製就好，對《愛不完》呢首歌更係情有獨鍾，當刻係有啲妒忌，而杜自持就好想編黃凱芹寫畀華仔嘅《一個人睡》，大讚呢首歌Melody好出色。
Chris指當年對《愛不完》呢首歌非常鍾愛

二人過往喺演唱會交流最多，開始變熟絡，黃凱芹笑言最難忘係有一次綵排見有專人幫杜自持整理譜，再分派畀其他人，當啲band彈得未係咁上手，啲七字真言、八字真言就飛出嚟，猶如一個戰場咁。
兩位經驗豐富嘅音樂人再次合作

杜自持解釋當時黃凱芹好認真唱，自己好用心彈，跟住歌聲起伏，要一路聽歌聲去彈，好想啱當刻嗰個feel，但係有啲人就唔聽住綵排嘅歌聲，杜自持覺得出嚟嘅感覺係唔好。黃凱芹為音樂會創作新歌《陪你唱》，要求杜自持編曲唔收酬勞。