《得寵先生》捐千磅狗糧予狗舍 Amy餵食陪玩重遇讚真人版「悅娜」

近日熱映嘅香港電影題材相對沉重，不過其中相對令人暖心，上映踏入第3周嘅《得寵先生》，喺片中飾演動物義工「悅娜」嘅 盧慧敏，日前就同導演兼編劇 李志偉 仲有飾演「佳叔」外籍女婿嘅 陳俊利 ，直踩位於大埔林村嘅狗舍「浪浪之家」捐狗糧同物資，Amy仲率先為狗狗試食狗糧，唔止搬狗糧、抹狗尿，又一直向未覓得家園嘅狗狗餵食同陪玩，雖然一身都小腳印同口水，不過戲裡戲外一樣愛狗嘅Amy就笑言係「幸福烙印」喇。

Amy大受狗舍嘅一班大小朋友歡迎
《得寵先生》獲贊助450kg狗糧捐助予「浪浪之家」，狗糧堆滿足手推車之餘，導演同贊助商代表、仲有Amy同陳俊利都齊齊落手落腳，將幾十包送到狗舍同放入糧倉。Amy話：「雖然話幾十包糧好似好多，但其實只夠食用兩星期。除了狗舍嘅狗狗，仲有餵開嘅流浪狗同其他暫托狗。眨吓眼就食晒，所以要呼籲各界繼續捐物資、糧食，幫助狗狗或者唔同動物團體，同埋支持領養不棄養。」
呢日導演、Amy、女婿同贊助商一齊帶同逾千磅狗糧捐助狗舍

Amy呢日一到場就「悅娜」上身，去狗BB住嘅房間餵食，見到地上有狗尿就立即清潔同消毒，又溫柔同狗狗傾偈。帶住零食嘅佢受盡狗狗熱情歡迎，十幾隻狗狗包圍又撲到佢身上。當佢一踎低就被狗狗投入懷抱，被狂舔面同嘴，開心到Amy哈哈大笑。
Amy被偷吻一刻靚樣崩盤

期間Amy仲被發現偷食狗糧，佢就話：「呢款狗糧人都可以食，因為好高蛋白 質，我偷偷地食咗一粒，無乜味，其實貓糧都係無乜味，我試過，好奇嘛，好多主人都會試食。好開心有呢啲咁健康、充滿營養嘅狗糧畀呢度嘅狗狗。」

而呢日大家探訪嘅「浪浪之家」創辦人April，其實就係《得寵先生》Amy飾演嘅「悅娜」原形人物，早喺電影開拍前Amy就曾向佢取經，了解動物義工日常運作同面對嘅人同事。
Amy飾演嘅角色其實參加自狗舍創辦人April

Amy話：「好開心見返April，佢依然好忙，照顧好多狗狗，成個人發光！而我一嚟到就好似返入角色，見到有尿尿就抹，有消毒就即刻攞嚟用，勾起好多拍攝嘅回憶！」
雖然狗糧睇落唔少，不過Amy指兩個星期就會食晒，希望外界多多協助各機構

當Amy得知當日有3隻小狗被領養時就表現得非常開心，不過知道會接收廿多隻流浪狗，對狗舍負擔大增亦令佢覺得擔心：「最初我以為April打理狗舍同照顧流浪狗，係一個有愛心嘅女人，認識之後發現佢仲好堅強同好忙碌，有好多問題要解決。」而April就指：「其實唔止我，每位喺香港搞狗舍嘅場主都好困難，都有自己嘅煩惱。」