鄭丹瑞拍戲中暑暈倒險爆頭 盧慧敏竟因周星馳見死不救？

鄭丹瑞（旦哥）、盧慧敏（Amy）同廖子妤（Fish）近日四出宣傳新戲同謝票，旦哥被爆料拍攝時一度中暑暈低，佢憶述中暑當日，係喺狗舍露天空地拍攝一場同Amy打掃嘅戲份，旦哥表示：「當時中午一點幾，又唔放飯，電影就係咁，導演又唔肯放飯，三十幾度，好曬，嗰場戲我洗緊狗屎，突然眼前一黑，我就『嘭』一聲瞓低。後來有工作員話我知，當時我同一個石級只差少少，如果一撞落去就『係咁先』！」

盧慧敏 鄭丹瑞 廖子妤
旦哥話笑言自己喺中暑當日睇到人性嘅冷暖：「尤其係呢個Amy Lo，得我哋兩個人做戲之嘛，我中暑暈低，『嘭』聲瞓咗喺地，佢只係望住我。」Fish嘗試為Amy解圍，指對方以為旦哥只係演緊戲，旦哥就接住表示：「所有人都以為我仲做緊戲！因為之後導演同我講，佢當時心諗『做得幾好喎⋯點解仲唔起身？』」Amy亦表示：「係呀，事後我哋全部嚇到黐線！」
旦哥爆 Amy見死不救。
Fish指當時時機咁好，大家又以為係演戲，咁係咪可以套用到喺電影入面？但旦哥就話因為劇情唔啱，所以用唔到喺電影入面，之後旦哥又帶笑怪責當時同場嘅Amy：「你係目擊證人，而你選擇不顧而去！」
Fish喺戲中飾演旦哥個女。
Amy解釋當時真係以為旦哥扮暈，因為對方成日都會即興表演：「旦哥坐喺一張普通櫈上，跌落地，普通人都係好大件事，嗰日佢仲包住條腰，有腰痛。當時一部攝影機拍住我，另一部拍住佢，佢跌倒之後，我心諗『死啦，導演未嗌cut喎，我繼續演自己嗰部份。』因為我諗起周星馳嗰句『導演未嗌cut都要繼續演』！」大家都忍唔住爆笑。旦哥說：「周星馳影響你咁緊要？人命你都唔理，周星馳唔係教你見死不救喎！」Amy話導演嗌cut後，旦哥依然無反應，大家先知出事。
旦哥喺拍攝現場暈倒。
有驚無險，旦哥之後回復清醒，他講笑話：「當時導演走埋嚟關懷備至問候我，然後俾咗兩個選擇我，一係依家繼續拍，一係休息一陣繼續拍！然後我自己會諗，如果我係導演我會點呢？我都係會叫演員繼續拍，因為時間好緊迫。」佢講笑話好後悔，自己應該做返一個演員，堅持要返屋企。
Amy 旦哥
旦哥指當日劇組搵咗間有冷氣嘅房畀佢休息，不過中途就不停咁走入嚟問佢「得未」，旦哥話 作為監製、演員，又做過導演，所以佢好好理解，亦唔係幾好意思瞓咁耐：「結果嗰日我真係拍晒。唔好以為電影世界好殘忍，其實經常都發生！」