尹光帶OneUp兩靚仔街頭快閃宣傳 預告3月開騷盼再與後輩合作

去年人氣爆燈，仲入圍電台頒獎禮最受歡迎男歌手最後階段嘅 尹光 ，人氣依然未減，日前佢就同8位舞蹈藝員仲有組合 OneUp 嘅 方智弘 同 賀邦，闖入銅鑼灣快閃鬧區，吸引過百人市民圍觀。

年屆80嘅尹光依舊精靈活潑
今次光B同新晉後輩合作，於街頭載歌載舞，原來亦係佢第一次同類表演，仲話非常開心，因為自己最鐘意同後生仔合作。光B仲爆早前就同 OneUp、加上MC JIN合唱一首洗腦廣告歌，又自言自己係Rapper。
呢日佢就同OneUp齊齊於銅鑼灣鬧市快閃

雖然光B已經80歲高齡，不過依舊精神好體力，佢就指持體力方法係日日運動，加上自己鐘意唱歌跳舞唔會停，仲會繼續推出新歌《命硬80》，佢話：「我一日行成萬步，最少都7千步，做人要漫步人生路嘛！哈哈。一星期打幾日乒乓波，噚日先同方力申打完，佢幾好波㗎，不過都係我贏佢少少，哈哈！會唔會同佢鬥游水？咁就梗係唔夠佢啦，唔得啦游水。」

仲分享自己保持健康完全係靠運動

光B快閃完之後已急急腳到南海出席商演，佢又預告3月將再開個人演唱會，仲話希望同今次拍檔OneTop研究合作，而兩位年青混血靚仔 賀邦 同 方智弘 就話個求之不得，仲話非常拜服前輩，更話光B比佢哋更為活潑，老當益壯咁話。

光B指3月就會再開騷，又話會研究再同OneUp嘅合作機會呀