林夏薇鑽石店開張眾星道賀 方力申《聲生不息》騷舞技嗌吃力

林夏薇 除咗又靚又好演技，仲好有生意頭腦，佢籌備5年，投資8位數嘅自家鑽石品牌實體店呢日開幕，得到唔少圈中朋友撐場，好似啱啱奪得新時代影帝嘅堂兄 林峯 同太太 張馨月 、譚俊彥同太太、陳展鵬、單文柔兩公婆、洪永城同太太梁諾妍、方力申、馬志威等。

林夏薇籌備多時嘅首飾店呢日正式開幕
得到咁多人嘅支持，薇薇都覺得好感激，佢仲大手筆向嘉賓一人送一粒鑽石，果然係霸氣女總裁。
唔少圈中好友齊齊到賀，薇薇更以每人一粒鑽石回禮

阿Shaun呢日帶埋太太到場，不過佢竟然大膽話唔打算買禮物送俾老婆，佢仲搞笑話想氹阿女去穿耳窿，咁就可以送對靚靚鑽石耳環俾前世情人。
Shaun呢日同太太一齊到場，仲話想買耳環俾囡囡

相反展鵬就話囡囡小豬比仲細個，未識得欣賞靚嘢，所以暫時可以慳返，而講到嚟緊嘅聖誕節，展鵬就要喺工作中度過，不過單文柔就話計劃到時會帶小豬比去探班。
展鵬預告聖誕將要開工，而Phoebe就會帶埋囡囡探班

呢日為開幕活動擔任司儀嘅Tony，講起好友黃翠如同蕭正楠即將榮升父母，佢除咗好開心，仲已經諗好送BB床，除此之外，佢仲話自己有好多心得可以分享俾新手爸媽，歡迎翠如同阿蕭隨時搵佢。
Tony嘅好拍檔翠如有喜，佢就話會分享自己嘅育兒秘笈喇

而小方為《聲生不息．大灣區季》擔任金曲推薦人，仲難得喺節目中大騷舞技，不過小方就坦言呢part真係考起佢，不過小方就話自己已經盡晒力，播出嘅效果亦已經超出預期。

小方早前參與《聲生不息》演出，不過要跳舞就考起喇