家燕姐拍廣告與年輕一代合作大讚 拍英文劇扮校監爆粗自己都嚇親

一向笑面迎人玩得又追貼潮流嘅 薛家燕 ，最近獲邀同新生代YouTuber 阿冰 同 程人富 合作拍攝廣告，家燕嫲嫲唔止向佢哋傳授絕技十字步，仲研發新招式將十字步進化。呢日嘅活動開幕禮，家燕姐就化身幸運女神，以佢出晒名嘅幸運之手示範巨型「玩轉個扭蛋機」，仲一擊即中扭到K-Pop演唱會門票，令佢非常開心。

家燕姐早前同阿冰仲有程人富合作拍攝廣告
家燕姐首次拍攝嘅英文劇集《選美兄弟班》開始播出，佢呢日提到拍攝過程話：「第一次拍英文網劇，第一次同鍾麗緹囡囡合作，套劇全英文對白，我飾演校監，故事講我俾人恐嚇，人生第一次講粗口，仲要係英文粗口。梓軒叫我試吓講粗口，代表唔怕黑幫，工作人員諗唔到我會講，所以好震撼，仲要拍咗兩take講咗兩次。」
早前佢拍攝嘅首部全英語網劇已經開始播出

而首次同小薯茄加上程人富同阿冰合作拍廣告，佢就大讚程人富有偶像外貌，阿冰就十分靚女。非常識做嘅家燕姐仲笑言，原先諗住幫心肝乖孫申請信用卡，可惜因為孫仔3歲都未夠，暫時未能登記。
家燕姐仲大讚兩位年輕拍檔

而程人富計劃明年底結婚，而未婚妻因身處加拿大忙於工作，所以已忙於自己籌備婚禮。家燕姐以長輩身份對程人富教路話：「你就嚟結婚我俾啲意見，酒席要搵好地方，年尾擺酒時間好緊張，要搵啲好優惠，嚟緊我會去多倫多，搵你個未婚妻，到時幫你傳話。」
非常識做嘅家燕姐仲話想幫孫仔申請信用卡

之後佢又大讚極受年輕一輩歡迎嘅小薯茄，指印象極好，仲係非常好嘅拍擋：「離遠見到我就叫咗我先，令我好舒服，我應承你哋去完多倫多、吉隆坡，可以去拍雪櫃冷笑話，宜家先交出一個冷笑話，雖然我姓Sit，但係我鍾意Stand。」阿冰就笑言細個毎日都睇《皆大歡喜》，可以話睇住家燕媽媽長大。