羅志祥怕觀眾冷場無信心攻大巨蛋 曾主持經典綜藝節目將停播感可惜

小豬 羅志祥 一向係鞋癡，屋企收藏波鞋超過5000對，近日佢喺台北舉辦個人鞋展，展出過百對潮鞋，當中最珍貴一對要價500萬台幣。今次係小豬第三次搞鞋展，佢話全部收藏都係非賣品，主要係想同其他鞋友交流心得，因為相信愛好者同自己一樣，當見到實物時更有實在感，並特意在店內安排播放鋼琴音樂，因為唔想播快歌令店舖似足一般波鞋店，希望提供一個好嘅環境，令愛好者好好欣賞波鞋。

小豬再次舉行波鞋展，公開分享自己嘅收藏
年尾小豬將會喺高雄巨蛋舉行兩場跨年騷，不過小豬就話唔會邀請嘉賓，因為畢竟入行近30年，有好多事物想同觀眾回顧分享，亦為呢個30年里程碑，為青春埋一個單，買一個回憶。

被問到會否效法周杰倫同張惠妹攻大巨蛋？小豬笑指大巨蛋人太多，自己於小巨蛋開開心心唱歌就夠，怕到時唔夠觀眾會有壓力。
呢日佢亦提到暫時未有喺大巨蛋開騷嘅計劃

小豬曾經主持過節目《娛樂百分百》，日前傳即將停播消息，曾經憑節目得到金鐘主持人獎嘅小豬都覺得好可惜，畢竟係長達27年歷史嘅長壽節目，亦係陪伴好多人嘅青春回憶，同時創造出好多經典主持，包括大小S徐熙媛、徐熙娣、黑人陳健州、愷樂、小鬼黃鴻升等，只好將過去留在記憶中。

佢又對自己主持多年嘅《娛樂百分百》傳停播表示可惜