郭富城美國展開巡迴個唱 全場合唱跟跳《對你愛不完》

郭富城 8月喺紅館展開13場全新個唱，而踏入12月，今次個唱嘅世界巡迴亦正式展開，城城同團隊首站就直衝美國三藩市演出喇。原來城城已差不多成廿年未有到當地演出，所以當早前宣佈開唱時，SF歌迷都非常雀躍，門票更係瞬間售罄。

郭富城嘅世界巡迴演唱會於三藩市展開
呢晚演唱會於一個落成年多嘅新場館演出，更因三藩市觀眾對城城演唱會期待已久，所以呢晚座無虛席。一向認真嘅城城對呢次世界巡演非常重視，雖然未能將原裝舞台運抵當地，不過亦要求製作團隊利用視覺特效，虛擬方塊凱旋門重現舞台，配合開場曲《EXIT》表演。
久未到訪當地嘅Aaron呢次演出全場爆滿

城城甫出場，觀眾就報以熱烈掌聲。最令城城感動嘅係，現場觀眾幾乎每首歌都跟住佢全場大合唱。當城城獻唱《您》時，又再次特別感謝世界各地歌迷，希望借此曲表達謝意，佢話：「多謝大家一直以來無間斷支持，我覺得自己好幸福，就係有一班咁長情嘅歌迷！希望大家喜歡我親自作曲嘅《您》！亦希望下次再見，隔一年就好喇！」
佢亦再一次感謝多年來一直支持自己嘅歌迷

每次城城演出當唱到《愛的呼喚》時，觀眾都會營造浩瀚燈海，城城話，每次見到都一樣感動。呢晚以《對你愛不完》作壓軸歌曲，城城仲引領歌迷全場大合跳兼做招牌動作，所有觀眾都起身熱情和應，將氣氛推至高峰。
今個周末城城將喺洛杉磯演出

而完騷後唔少歌迷，仲因為久未同城城見面，聚集喺場館外等候城城，城城完成三藩市演出後，今個周末就會轉往洛杉磯，而聖誕過後就會返到亞洲喺台北演出。