羅啟豪獲粉絲舉辦聖誕市集 鄭丹瑞及中聲家族剪綵撐場

羅啟豪 嘅歌迷會「豪吧」不時花盡心思為Ramon送驚喜，適逢聖誕佳節來臨，佢哋就舉行迷你市集，作為聖誕禮物送畀Ramon。開幕禮當日，更獲旦哥鄭丹瑞、胡渭康，以及《中年好聲音》家族吳大強、丁文俊、魏嘉信、顏米羔、劉威煌、黃健文、安雅希、周碧嘉、梁浩賢、顏志恒一家等參與剪綵儀式。

豪殼出心出力，以Ramon名義舉辦慈善市集，仲邀請旦哥同一班「中聲」老友參與
Ramon指今次市集係人生重要嘅里程碑，所以邀請自己非常重視嘅嘉賓見證開幕，佢強調市集唔係歌迷會活動：「歌迷會用一般市民嘅角度去構思市集內容，希望訪客食得、玩得、買得開心。」佢再補充，舊年年尾曾經舉辦咗冬日音樂會，今年嘅聖誕市集係延續篇。
Ramon指今次邀請嘅嘉賓都係自己非常重視嘅朋友

身為主辦首領嘅佢，仲親自向到場參觀嘅訪客介紹市集

旦哥趕住出席謝票場前，專程到嚟支持Ramon，佢笑指：「今日天氣本來有啲寒意，但一走入呢個市集，就可以感受到啟豪帶畀大家嘅溫暖，我好高興見到咁有意義嘅活動，除咗熱愛唱歌之外，啟豪真係身體力行去回饋社會，我作為前輩，會全力支持佢！」講起旦哥同Ramon嘅淵源，原來旦哥當年有追看《中年好聲音》，仲希望支持一班畢業生追夢，所以之前邀請過Ramon出席活動，Ramon好感激旦哥支持，仲呼籲大家要支持旦哥嘅電影新作。
大班歌迷同Ramon一齊開香檳為市集舉行開幕儀式

剪綵儀式後，Ramon充當星級領隊帶嘉賓參觀市集，見到大強哥、魏嘉信同顏米羔等人都玩得盡興。市集更設有Ramon嘅二手衫義賣同埋由佢親手上色嘅鴨仔拍賣，籌得善款會捐到服務癌症兒童及其家人嘅「生命小戰士會」。

現場義賣所得嘅善款，以捐助予「生命小戰士」協助癌童同家人