蕭正楠與「一姐」合唱劇集歌深感榮幸 吳若希反擊樂壇前輩講嘢有年代感

TVB新劇《奔跑吧！勇敢的女人們》講蕭正楠周旋於吳若希（Jinny）同賴慰玲之間，呢日阿蕭同Jinny為劇集歌《再度能感動嗎》錄音，二人均係歌手出身，錄歌當然冇難度，首歌嘅內容更同佢哋喺劇集嘅角色好有關係。

Jinny同阿蕭合演《奔跑吧！勇敢的女人們》亦合唱劇集歌曲
阿蕭話佢同Jinny喺劇中飾演兩夫妻因一個誤會而喺埋一齊，後嚟二人反思喺呢段婚姻當中，自己為對方放棄咗好多嘢，好似係時候去追求番自己嘅嘢，阿蕭笑指能跟「一姐」Jinny合作感到榮幸，只係掹到邊去唱咋！
阿蕭指同「一姐」合唱非常榮幸

阿蕭多謝Jinny唔抗拒一齊合唱，亦大讚Jinny把聲好靚，二人把聲結合各自有特色，講起歌壇資歷，阿蕭絕對係前輩，Jinny被嗌「一姐」後即反擊，指自己細個已聽阿蕭唱歌，先讚阿蕭都幾靚仔，今次親身合作，指阿蕭係用和音去lead住主音嚟唱，而阿蕭即場清唱出道年嘅大熱作品《接受我》。
Jinny聽到就反擊指阿蕭係大前輩

阿蕭話喺公司唱合唱歌對上一次已經係廿年前嘅《戀愛自由式》主題曲，廿幾年後再合唱劇集歌就係同Jinny唱，齋睇訪問互笠高帽，已可以想像佢哋好有火花！阿蕭記得上次拍完《巨塔之后》同Jinny、馬國明同張頴康坐高鐵返港，佢哋吹水講咗個半鐘全程狂笑，Jinny話佢哋三個講嘢太好笑又有年代感，阿蕭再反擊話Jinny早晚會遇到呢樣嘢。

兩人互窒內容勁搞笑