Yumi成年撞正考試拍劇忙到暈 為儀式感第一時間換成人身份證

啱啱踏入18歲正式大個女嘅 鍾柔美 平安夜以一身非常應節嘅大紅打扮，參與一個音樂活動演出，即場為大家歌舞表演，當然唔少得唱吓聖誕歌曲同大家一齊感受節日氣氛啦。21號正日生日嘅Yumi，原來當日要考試，之後又要趕去深圳拍劇，雖然忙到出煙，不過佢就決定第一時間去換成人身份證喇。

Yumi平安夜出席音樂活動勁歌熱舞
覺得自己真正大個女嘅佢，又因為太忙而未正式慶祝，所以之後就要安排時間好好同家人朋友為咁值得紀念嘅日子好好慶祝喇。應邀為《聲生不息》擔任飛行嘉賓嘅佢，又認為呢次演出係自己最好嘅生日禮物，加上同唔少前輩有機會合作，經驗值可以話大大Level Up咁話。繼《聲夢》後再同導師 衛蘭 再會，Yumi就話全程都有老師同場，自己心都定返唔少喎。
獲邀參與《聲生不息》嘅佢又話獲益良多

施匡翹 呢日亦係表演嘉賓之一，佢仲分享歷來收過唔少非常印象深刻嘅禮物，好似情人節會為單身嘅佢送花，非常貼心又甜蜜呀。

騷長腿嘅施匡翹指自己嘅歌迷非常可愛