中年好聲音3丨35強首度展開團戰 張崇德讚眾人有備而來

嚟緊星期日播出嘅《中年好聲音3》，35強將會首度展開團戰，最低分嘅3組中，將會有5人被淘汰，揀好歌後呢日各組都嚟見導師張崇德同音樂監製張家誠。

《中聲3》即將踏入團戰，已分組嘅成員同導師討論比賽
被譽為魔王級別嘅張與辰就成為隊長，佢嗰Team就選唱〈小幸運〉，導師們畀佢哋嘅意見就係要練習多啲。對於可以被與辰隊長carry，佢為隊員之一嘅侯靜依就話相當安心，仲讚對方嘅前期工作做得相當好，喺揀歌時已經聽到各隊員聲音嘅特質，安排好唔同段落畀大家，而喺練歌期間又已經了解晒各隊員嘅背景，所以組員間嘅默契同感情係增進咗唔少。
成為隊長嘅張與辰令隊員非常安心

上一集憑〈狂野之城〉唱跳演繹而奪得5燈過關嘅李創偉，佢喺呢round就擔任隊長，帶領隊員演繹張國榮嘅快歌〈大熱〉，擅長跳舞嘅佢仲幫成個team度埋舞步。
五燈李創偉選歌之餘仲為大家研究舞步

見完一眾選手後，兩位導師都讚佢哋係有備而嚟，張崇德指今次挑戰難度最高嘅係要五把唔同聲音唱同一首歌，所以佢畀嘅貼士就係大家去到比賽時唔可以太斯文，五個人要同時落力去做同一件事，咁先會產生良好嘅化學作用。張崇德話希望大家聽完佢嘅意見後，可以消化到再放鬆去享受個比賽。而張家誠就指一眾參賽者要表現得再自信啲，佢又指部份參賽者嘅設計係非常之好，但始終比賽有機會出現啲現場意外，又或者會緊張，所以佢希望大家唔好over咗，設計啲太難嘅嘢去出戰。