許靖韻新歌搵洪卓立合唱新版 廣州fans見面會首度公開合唱

小背心 許靖韻 上月推出新歌《作賤》，日前再推出合唱版《作賤。矛盾》，同好友 洪卓立 合唱。早前Ken同Angela同師弟 余浩斌 仲有師妹 戰金意 喺廣州舉行粉絲見面會，當日就首次公開演唱新歌同首播mv及首唱歌曲，吸引歌迷迫爆三層商場。

Angela邀請阿Ken推出苦情歌嘅合唱版，日前喺廣州首次公開演唱
《作賤》推出後，Angela同監製都認為獨唱版可以加入男聲回答問句，最後決定邀請Ken演繹，Angela話：「由《今晚唱飲歌》到巡迴音樂會做嘉賓，大家都覺得我哋兩個人嘅聲底、聲線好夾，一直都希望有一首合唱歌，今次就好啱數啦。」
原版《作賤》推出後反應不俗

合唱歌詞編排雖然女段沿用原歌詞，但Angela亦重新錄製；至於男歌詞則重新創作，Ken話：「我以旁觀者身份分享男人嘅解答同無奈。以往自己嘅單曲都有一種講故事嘅感覺，呢首歌更加係互相對答咁樣，所以同我自己本身嘅歌嘅感覺好配合。」
阿Ken歌曲中以旁觀者身份講出男人於感情中嘅無奈

《作賤》獨唱版喺串流音樂平台有唔錯成績，而合唱版更擊中唔少男女嘅愛情困境，Angela同Ken就指演繹歌曲時，要多謝身邊朋友：「其實因為各自身邊嘅朋友都有差唔多嘅經歷，聽得多佢哋嘅故仔，演唱時更容易投入感情、更加理解歌詞當中嘅份量。」