陳曉華29歲生日蛋糕食足十幾個 事業起飛劇接劇婚事再等等

2018年參加香港小姐競選奪得冠軍入行嘅 陳曉華 ，星期五踏入29歲，佢喺社交平台分享今年嘅生日慶祝活動，前前後後總共有12個蛋糕，認真厲害。近日正於深圳拍攝新劇嘅Hera，就獲同劇拍檔 高海寧 何廣沛 仲有 郭柏姸 等為佢慶祝，送上禮物、鮮花同蛋糕之餘，仲預祝獲提名台慶頒獎禮最佳女配角同飛躍進步女藝員嘅壽星女會順利得獎。 

正拍攝新劇嘅Hera獲高Ling同廣沛等同事慶祝
去年可以話係Hera事業起飛嘅一年，之前參演嘅劇集先後播出，好似台慶劇《巾幗梟雄之懸崖》同剛播完嘅《異空感應》都演出重要角色，而早前嘅2025年節目巡禮當中，Hera更將參與其中4部重點作品演出。
早前於《巾幗》飾演桂花香

《異空感應》更一人分飾兩角

除咗事業之外，Hera亦已承認同 朱敏瀚 已低調拍拖一段時間，雖然早前曾有指佢哋2024年底會成婚，不過近來拍完《金式森林》又緊接拍攝《夫妻的博弈》，仲有之後嘅《新聞女王2》，可見兩人婚期短時間內應該都未會成事喇。

Hera食足十幾個蛋糕慶祝，祝佢事業今年同蛋糕數量一樣飽滿豐盛