張頴康回顧追麥雅緻約睇戲 網上罕示愛紀念17年感情甜爆

張頴康 12年前迎娶2005年港姐參選佳麗 麥雅緻 ，婚後兩人育有三名子女，Angie更引退照顧小朋友，同時重拾參選前嘅專長，攻讀兒童教育碩士學位，一家人被視為圈中模範家庭。

阿康同Angie婚後育有三名子女，非常幸福
原來今日更係佢哋夫婦當年首次通電話嘅紀念日，平時扮演警察或者大奸角都入型入格嘅阿康，就分享當年今日心仔卜卜跳約Angie睇戲嘅心跳回憶喇，佢寫道：
原來近日係佢哋首次通電話嘅紀念日

17年前嘅1月4號，當日我哋第一次聯絡！
我好記得我哋講電話嘅時候，係我人生中個腦轉數轉得最快嘅時刻！因為我要用呢個千載難逢、可一不可再嘅機會，約到呢個女仔出嚟睇戲！
今年嘅1月4號，咁啱我有一日假期返咗香港，所以都好簡單咁出去睇場戲慶祝一下！
好多謝呢個女仔當日打咗呢個電話畀我！因為呢一通電話，改變咗我嘅一生！令我嘅人生從此有180度嘅轉變！
老婆，多謝你！我愛你！
真係甜到甩牙

咁多細節都記得咁清楚，呢個男人真係冇嫁錯。其實當年佢哋係因為06年台慶表演舞蹈綵排而初相識，而習慣收聽一個電台節目嘅Angie，因為節目播出時間更改，上網搜尋時竟發現阿康竟然係其中一位主持人，繼而有更多話題，阿康亦因而約到Angie睇戲，再拍拖而結成夫婦。

早前佢哋如願展開歐洲之旅
外貌粗獷型爆嘅阿康，就趁住17周年紀念，再約老婆一齊睇戲慶祝，拍拖欣賞破紀錄熱播嘅《破．地獄》，早前仲難得放低子女，藉阿康飛赴布拉格拍劇之便，順便歐遊。原來呢次歐洲旅行，係Angie同阿康10年前誕下長女Makayla時已經約定，今次二人世界就先後遊覽布拉格、德國、奧地利同倫敦喇。

Sweet爆享受二人世界