AI君如問借錢原來係廣告 森美面對被「騙上騙」 呼籲提高警覺

森美、張繼聰、余安安、慧妍雅集 嘅成員等呢日現身一個慈善保齡球賽，精通唔少運動嘅森美原來打保齡都係初級水平，佢呢次受身為演藝人協會秘書長嘅張繼聰邀請出賽，不過佢估唔到在場咁多高手，特別係馬來西亞國家隊嘅朋友，森美笑言淨係裝備方面經已輸幾條街，所以森美都打定輸數。

森美呢日參加保齡球賽，重提幾乎被AI君如呃到一事
森美最近被疑似由AI生成嘅吳君如致電問借錢，佢仲上載片段叫大家小心提防被騙，但後來發現呢段片係廣告既其中一部分，雖然擺咗個烏龍，但係森美都希望大家提高警覺，因為騙徒手法層出不窮，依家電話詐騙科技大大提高，唔止用通話詐騙，更發展到有聲有樣，希望唔止老人家，連中年青年都需要小心。

而張繼聰啱啱同太太謝安琪、同埋一對仔女去咗個日本享受天倫樂，首次喺外地迎新年嘅阿Kay仲喺網上分享倒數片段，不過High爆嘅阿Kay數數下漏咗幾秒相當搞笑。而阿聰就透露佢地一家四口首度喺外地倒數迎新年，事前擔心塞起去景點既途中，所以喺地標外圍倒數，更開心嘅係咁啱有親戚同期喺大阪旅行，大夥兒相約食飯非常難得。 阿聰嘅新歌新戲即將推出，所以佢都話呢次家庭旅行可以讓佢叉爆電迎接跟住排山倒海嘅工作。
阿聰新歌新戲都即將推出，日前就舉家出遊充電倒數

接任慧妍雅集會長既朱凱婷呢輪著手籌備3月舉行嘅慧妍雅集年度最大慈善晚宴，透露知道市況唔係好容易，所以未有為善款設目標，反而著眼呼籲善長多多支持，希望可以多多籌備一啲支持身心靈健康嘅活動。

朱凱婷接任慧妍會長後，已開始籌備年度晚宴