謝霆鋒罕有PO父子照 與大仔Lucas北海道滑雪

去年謝霆鋒暗示過有意喺香港舉行演唱會後，陸續傳出有唔同消息，有指佢將會去到啟德體育園開騷，更有網民影到疑似係霆鋒喺草地上試咪嘅片，而背景音樂更係霆鋒嘅《活着VIVA》，令香港樂迷相當期待。
霆鋒早前去咗北海道滑雪。
演唱會消息就仲有待公布，早前霆鋒趁住假期，難得帶埋大仔 謝振軒Lucas 同好友 徐濠縈、KB等去咗北海道嘅二世古東急格蘭比羅夫滑雪場滑雪。霆鋒 7號喺社交平台PO出4張當日喺雪地影嘅相，雖然喺霆鋒PO出嘅兩張相入面，Lucas都係包得勁密實，勉強可以睇到對眼，不過強大嘅網民仍然可以一眼認出Lucas。
父親嘅背影。
相中着上深啡色滑雪外套配深色迷彩褲嘅霆鋒，單單喺雪地上扶住滑雪板睇地形嘅相，都已經令唔少fans讚被帥到，更有網民指佢同同樣着住大地色系滑雪裝嘅Lucas，睇落似兄弟多過父子，亦有唔少網民留言話好難得會見到霆鋒上載 Lucas嘅相，不過最多人留言講嘅都係，叫霆鋒快啲公布幾時開騷呀。

大仔Lucas都有同行。網民靠對眼就已經認出Lucas！